127 مىڭنان استام تالاپكەر ناتيجەلەرىن 7 تامىزدا بىلە الادى، دەپ حابارلايدى infohub.kz سايتى.
2026–2027 وقۋ جىلىنا ارنالعان مەملەكەتتىك ءبىلىم گرانتتارىن بەرۋ كونكۋرسىنىڭ قورىتىندىسى 7 تامىزدا ساعات 15:00-دە جاريالانادى. بۇل تۋرالى ق ر عىلىم جانە جوعارى ءبىلىم ءمينيسترى ساياسات نۇربەك مالىمدەدى.
ءمينيستردىڭ ايتۋىنشا، رەسپۋبليكالىق كوميسسيا مەملەكەتتىك ءبىلىم گرانتتارىن ءبولۋدى اياقتاعان. كوميسسيا قۇرامىنا مەملەكەتتىك ورگانداردىڭ، قوعامدىق ۇيىمداردىڭ، ءبىلىم سالاسىنداعى كاسىپوداقتاردىڭ، «اتامەكەن» ۇلتتىق كاسىپكەرلەر پالاتاسىنىڭ جانە جوو قاۋىمداستىعىنىڭ وكىلدەرى ەندى.
«بيىل كونكۋرسقا 127 مىڭنان استام ءوتىنىم ءتۇستى. تالاپكەرلەر اراسىندا „پەداگوگيكالىق عىلىمدار“، „ينجەنەرلىك، وڭدەۋ جانە قۇرىلىس سالالارى“ جانە „اقپاراتتىق-كوممۋنيكاسيالىق تەحنولوگيالار“ باعىتتارى ەڭ تانىمال بولدى»، — دەدى ساياسات نۇربەك.
مينيستر سونداي-اق بيىل بولاشاق اۋدارماشىلاردى، ديپلوماتتاردى، زاڭگەرلەردى، پسيحولوگتاردى جانە پەداگوگتاردى دايىندايتىن ءبىلىم باعدارلامالارىنا ەڭ جوعارى كونكۋرس كۇتىلەتىنىن اتاپ ءوتتى.
مەملەكەتتىك ءبىلىم گرانتتارىنىڭ يەگەرلەرىنىڭ ءتىزىمى 7 تامىزدا ساعات 15:00-دە عىلىم جانە جوعارى ءبىلىم مينيسترلىگىنىڭ رەسمي اقپاراتتىق رەسۋرستارىندا، سونداي-اق ۆەدومستۆو باسشىسىنىڭ الەۋمەتتىك جەلىلەردەگى پاراقشالارىندا جاريالانادى.
مينيسترلىك جوعارى وقۋ ورىندارىنا قۇجات قابىلداۋ 2026 جىلدىڭ 25 تامىزىنا دەيىن جالعاساتىنىن ەسكە سالدى.
«قۇرمەتتى تالاپكەرلەر! ەرەسەك ومىرگە قادام باسقان جولدارىڭىز جارقىن جەتىستىكتەرگە، جاڭا مۇمكىندىكتەرگە جانە ۇلكەن تابىستارعا تولى بولسىن. شىن جۇرەكتەن ەڭبەكتەرىڭىزدىڭ اقتالىپ، ءارقايسىڭىز ارمانداعان ۋنيۆەرسيتەتىڭىزدىڭ ستۋدەنتى اتاناسىزدار دەپ تىلەيمىن»، — دەدى مينيستر بولاشاق ستۋدەنتتەرگە.