اۆتورى:
عابيدەن قوجاحمەت،
قىزىلوردا قالاسى

ءبىلىمدىنى ۇناتادى بۇل عاسىر

جيىپ الىپ بالعىن شاكىرت دوستاردى،
سالتاناتتى ساتكە بولەپ جاس جاندى.
مەكتەپتەردىڭ قوڭىراۋى قاعىلىپ،
تاعى، مىنە، ءبىلىم كۇنى باستالدى!

سىڭعىرلى ۇنگە جاس بالدىرعان تامساندى،
اتا - انا دا وسى كۇندى اڭسار - دى.
قول جەتكىزگەن جەتىستىكتەر ەلەنىپ،
كەلەشەككە جوسپارلار دا جول سالدى.

ەكشەپ الىپ دۇرىسى مەن بۇرىسىن،
كۇتەدى دەپ تاعى قانداي ۇلى سىن.
ءاز ۇيادا باستالادى ساباقتار،
ەستىلەدى اۋلاسىنان كۇمىس ءۇن.

شاكىرت بويدا بولادى ءار كەز سان قىلىق،
سولار باردا، بولاشاققا جاندى ءۇمىت.
"اپاي، اپاي، مەن ايتايىن!" دەگەن ءۇن،
تۇرادى ەندى سىنىپتاردا جاڭعىرىپ.

اۋەلەيدى ءبىلىم اتتى اسقار ءان،
وسى جولدا قانداي سىناق توسپاعان.
جاس ماماندار كىرەدى العاش يمەنىپ،
ءبارى سولاي ەڭبەك جولىن باستاعان.

ءبىلىم قىمبات، ونى جۇرتتار بىلەدى،
جەتەلەيتىن ۇستاز سوعان ۇنەمى.
شاكىرتىمەن دوستارىنداي سىرلاسقان،
سەنسىڭ، ۇستاز، مەكتەبىڭنىڭ جۇرەگى.

قوسىلسىنشى ءبىلىم اتتى سىرعا سىر،
وزگەرسە دە ۋاقىت اتتى جىل، عاسىر.
ءبىلىم جالعار داۋىرلەردىڭ اراسىن،
ءبىلىمدىنى ۇناتادى بۇل عاسىر.

وسى جولعا ۇمتىلادى بۇگىن جۇرت،
كەلەشەكتەن اسقارالى ۇعىم كۇت.
ازات ەلدىڭ ارمانى دا - وسىندا،
ازات ەلدىڭ اڭسارى دا - ءبىلىمدى ۇلت.

عاسىرىڭ بار توسا قويار سىناعىن،
سونى يگەرسەڭ، زامانىڭا ۇنادىڭ.
ءبىلىم كۇنى قۇتتى بولسىن، ۇستازدار!
ءبىلىم كۇنى قۇتتى بولسىن، ءمۇعالىم!

بالا شاعى، بولاشاعى ۇلتىڭنىڭ!

كيىمى دە، سومكەسى دە كوركەم-دى،
ءبىلىم جولدا ارمانى اسقاق جەلكەن-دى.
مەكتەبىنە بارا جاتىر ۇلتىڭنىڭ
ءاليحانى، احمەتى ەرتەڭگى.

ءبىر-بىر ءۇيدىڭ قىزى-ايى، ۇلى-كۇن،
بولا بەرسىن، ەركەلەۋ مە ءبىرى تىم.
مەكتەبىنە بارادى ولار ۇلتىنىڭ
ارقالاپ اپ ۇكىلەگەن ءۇمىتىن.

وتكەن ءداۋىر كورسەڭ دە ءومىر بۇرقاعىن،
تالاي مارتە جەڭىس جىرىن شىرقادىڭ.
ءبىلىم جولعا بەت تۇزەدى، مىنە، ەندى
ساناسى دا، ويى دا ازات ۇرپاعىڭ.

ۇل- قىزىم دەپ انا ۇيقىسى سان قاشتى،
بەسىك تەربەپ، كۇن مەن ءتۇنى الماستى.
سولار ءۇشىن الداعى ۇلكەن ءومىردىڭ
سوعىلادى قوڭىراۋى العاشقى.

بوبەگىنىڭ وياتسا انا تالعامىن،
تىلەيدى ەندى جاقسى شاكىرت بولعانىن.
سول بوبەكتەر الىپ بارا جاتقانداي
ءوز ۇلتىنىڭ جالاۋ ەتىپ ارمانىن.

بەسىگىنەن اسىققانداي بۇگىنگە،
ۇستازىنا ول ۇمىتپايدى گ ۇلىن دە.
ۇعا ءجۇرىپ زامانىنىڭ ءۇنىن دە،
سويلەيدى ولار باباسىنىڭ تىلىندە.

باستالعاندا ءبىلىم جولدىڭ اسقارى،
قادامدارىن ۇلكەندەر دە قوستادى.
ولار ءۇشىن سوعىلسا العاش قوڭىراۋ،
سول قوڭىراۋ - كەلەشەكتىڭ باستاۋى.

ماڭىزىن دا، ءمانىن دە ۇعىپ بۇل كۇننىڭ،
مىنە، تاعى بيىكتەرگە ۇمتىلدىڭ!
بارا جاتىر كوشەلەرمەن مەكتەپكە
بالا-شاعى، بولاشاعى ۇلتىڭنىڭ!

قاستەرلى تۇلعا - ءمۇعالىم!

ءبىلىمنىڭ عانا تيەگى،
مەكتەبىن جانى سۇيەدى.
قاراپايىم ماماندىق -
ۇستازدىق اتتى كيەلى.

بويىنا جيعان نۇر اعىن،
ءبىلىمنىڭ جاققان شىراعىن.
شاكىرتىمەن كوركەيەر
قاستەرلى تۇلعا - ءمۇعالىم!

شاكىرتكە شۋاق توگەتىن،
جانىنا مەيىر ەگەتىن.
ەڭبەكپەنەن جالىقپاي،
ءبىلىمنىڭ ءنارىن سەبەتىن.

بويىنا جيعان نۇر اعىن،
ءبىلىمنىڭ جاققان شىراعىن.
شاكىرتىمەن كوركەيەر
قاستەرلى تۇلعا - ءمۇعالىم!

كەشەگى بالاڭ تۇلەگى،
ەسىندە ماڭگى جۇرەدى.
كەتسە دە الىس وزىنەن،
ۇستاز بوپ قالار ۇنەمى!