قازاقستاندا ءبىلىم بەرۋ جوبالارىنىڭ كونكۋرسىنا ءوتىنىم قابىلداۋ باستالدى. ۇزدىك باستامالاردىڭ اۆتورلارى ءوز شەشىمدەرىن دامىتۋ مەن اۋقىمداۋ ءۇشىن 10 ملن تەڭگەگە دەيىن گرانت الا الادى، دەپ حابارلايدى infohub.kz.
ءوتىنىمدى 2026 جىلعى 30 شىلدەدەن 31 تامىزعا دەيىن بەرۋگە بولادى. كونكۋرس قورىتىندىسى بويىنشا بەس پەن جەتى جوباعا دەيىن قولداۋ كورسەتۋ جوسپارلانۋدا، ولاردىڭ ءارقايسىسى 10 ملن تەڭگەگە دەيىن الا الادى. جەڭىمپازدار 10 قىركۇيەكتە جاريالانادى.
كونكۋرس ءبىلىم سالاسىنداعى ءقازىردىڭ وزىندە جۇمىس ىستەپ تۇرعان جوبالارعا ارنالعان. ۇيىمداستىرۋشىلاردىڭ ايتۋىنشا، باستامالاردىڭ العاشقى ناتيجەلەرى، اياقتالعان پيلوتتىق كەزەڭى نەمەسە دايىن ءونىمى بولۋى كەرەك. تەك يدەيا دەڭگەيىندەگى جوبالار كونكۋرسقا جىبەرىلمەيدى.
«وزگەرىستەر ماسەلەنىڭ وزدىگىنەن شەشىلۋىن كۇتپەيتىن ادامداردان باستالادى. ءبىز ءدال وسىنداي كوماندالاردى – جۇمىس ىستەپ تۇرعان شەشىمدەرى، باتىل يدەيالارى جانە جۇيەلى جۇمىس ىستەۋگە دايىندىعى بار كوماندالاردى قولداعىمىز كەلەدى. ەگەر ءسىزدىڭ جوباڭىز مەكتەپ وقۋشىلارىنا، ستۋدەنتتەرگە نەمەسە وقىتۋشىلارعا كومەكتەسىپ جاتسا جانە ونى قالاي كۇشەيتۋگە بولاتىنىن تۇسىنسەڭىز، ءبىز ءسىزدىڭ ءوتىنىمىڭىزدى اسىعا كۇتەمىز»، — دەدى EA Charity fund ديرەكتورى ايدار بۇرىبايەۆ.
ءوتىنىمدى قازاقستاندا ءبىلىم بەرۋ باستامالارىن جۇزەگە اسىراتىن 21 جاستان اسقان جەكە جانە زاڭدى تۇلعالار بەرە الادى. الەۋەتتى قاتىسۋشىلاردىڭ قاتارىندا: ءبىلىم بەرۋ ستارتاپتارى، قوسىمشا، كاسىپتىك باعدارلاۋ جانە ينكليۋزيۆتى وقىتۋ ورتالىقتارى، وقىتۋشىلار مەن ستۋدەنتتەر.
باسىمدىق ساپالى ءبىلىمنىڭ قولجەتىمدىلىگىن ارتتىرۋعا، وقۋ ۇدەرىسىنە جاڭا تەحنولوگيالاردى ەنگىزۋگە، پەداگوگتاردى قولداۋعا، ينكليۋزيۆتى ءبىلىمدى دامىتۋعا جانە ءقاۋىپسىز ءبىلىم بەرۋ ورتاسىن قۇرۋعا باعىتتالعان جوبالارعا بەرىلەدى.
وتىنىمدەر قازاق جانە ورىس تىلدەرىندە Tamyr Platform سايتى ارقىلى 31 تامىزدا ساعات 23:59-عا دەيىن قابىلدانادى. قوسىمشا اقپاراتتى پلاتفورمانىڭ سايتىنان جانە الەۋمەتتىك جەلىلەرىنەن الۋعا بولادى.