بىرگە جازىلاتىن سوزدەر
تۇلعاسى وزگەرىپ بارىپ بىرىككەن سوزدەر قوسىلىپ جازىلادى. مىسالى: بۇگىن، بيىل، قىستىگۇنى، كۇزدىگۇنى، جازدىگۇنى، الاڭعاسار، اشۋداس، بەلبەۋ، اپار، اپەر، تۇرەگەلدى.

ەش، ءار، كەي، ءبىر، قاي، الدە سوزدەرىمەن بىرىككەن ەسىمدىك، ۇستەۋ سوزدەر ءتۇبىر تۇلعالارى وزگەرتىلمەي، بىرگە جازىلادى. مىسالى: اركىم، ءاربىر، ءارقايسى، ءاردايىم، ءارقاشان، ەشكىم، ەشبىر، ەشقانداي، ەشقايدا،، ەشتەڭە، كەيبىر، ءقايبىر، ءقايسىبىر، بىردەڭە، بىرنەشە، ءبىرتالاي، ءبىراز، ءبىرسىپىرا، ءبىرجولاتا، ءبىرىڭعاي، بىركەلكى، ءبىرقىدىرۋ، الدەقالاي، الدەقايدا، الدەقاشان، الدەقانداي.

ەسكەرتۋ. ەش، ءار، كەي، ءبىر، قاي، الدە سوزدەرى زات ەسىمدەرمەن تىركەسكەندە، بولەك جازىلادى. مىسالى: ەش ادام، ءار بالا، قاي ءۇي، كەي ادام، ءبىر جۇمىس، الدە جىلقى، الدە سيىر.

عىلىمنىڭ ءار الۋان سالاسىنداعى (ساياسي - الەۋمەتتىك، بيولوگيالىق، استرونوميالىق ت. ب.) تەرميندىك مانگە يە بولىپ قالىپتاسقان اتاۋلار جانە باسقا سوزدەر دە باستاپقى تۇلعالارى ساقتالىپ، داعدى بويىنشا بىرگە جازىلادى. مىسالى: ءباسپاسوز، ونەركاسىپ، كاسىپوداق، حالىقارالىق، قولباسشى، بەسجىلدىق، وڭتۇستىك، سولتۇستىك، اراقاتىناس، كوزقاراس، شەكارا، شەتەل، ەڭبەككۇن، شيكىزات، ءبىرقازان، اققۇتان، كوكقۇتان، قوساياق، قاراقۇيرىق، اققۋ، قاراقۇس، بۇزاۋباس، تاسباقا، ەسەكميا، جاۋجۇمىر، تۇيەقارىن، جەمشوپ، تەمىرقازىق، اقبوزات.

ەسكەرتۋ. كىسى اتتارىنىڭ دا ءتۇبىر تۇلعاسى ساقتالىپ جازىلادى؛ مىسالى: مەرگەنباي (مەرگەمباي ەمەس)، امانكەلدى (امانگەلدى ەمەس)، امانقۇل (امانعۇل ەمەس)، دوسجان (دوششان، دوششان ەمەس)، كۇنپەيىس، (كۇمپەيىس ەمەس)، جەتپىسباي (جەمپىسپاي ەمەس)، قارتباي (قارتپاي ەمەس)

ەكى ءۇش سوزدەن قۇرالعان گەوگرافيالىق اتاۋلار ءتۇبىرى ساقتالىپ بىرگە جازىلادى، ال اتتاس جەرلەردى ءبىر - بىرىنەن اجىراتۋ ءۇشىن الدىنان قولدانىلاتىن انىقتاۋىش سوزدەر باس ارىپتەن باستالىپ، بولەك جازىلادى. مىسالى: اقتوبەك، تالدىقورعان، قىزىلوردا، الاتاۋ، ەكىباستۇز، قىزىلجارقۇدىق، باتىس دۆينا، كىشى ازيا، ورتا ازيا، ۇلكەن قاراوي، وڭتۇستىك قازاقستان، باتىس قازاقستان