قازاقستان ۇلتتىق بانكى ءبىرىڭعاي QR كودى ارقىلى تولەم جاساعاندا كەشبەك الۋ مۇمكىندىگىن ءتۇسىندىردى، دەپ حابارلايدى infohub.kz.
ۇلتتىق بانك ءتوراعاسىنىڭ ورىنباسارى ب.جالەنوۆتىڭ ايتۋىنشا، ءبىرىڭعاي QR كليەنتتەرگە كەشبەك الۋعا مۇمكىندىك بەرەدى، الايدا ءار بانك لويالدىق باعدارلامالارىنىڭ شارتتارىن ءوزى بەلگىلەيدى.
«ءار بانكتىڭ ءوز ستراتەگياسى بار: بىرەۋلەر جوعارى كەشبەك ۇسىنادى، ەندى بىرەۋلەرى بارلىق وپەراسيالار ءۇشىن ستاندارتتى كەشبەك بەلگىلەيدى، ال كەيبىرەۋلەرى ترانزاكسيا تۇرلەرىنە قاراي سارالايدى. ءار بانك ءوز ستراتەگياسىن تاڭدايدى، سوندىقتان كەشبەك جانە لويالدىق باعدارلامالار ءارتۇرلى بولادى»، — دەپ ءتۇسىندىردى جالەنوۆ.
ول سونداي-اق بىرنەشە بانك ءبىرىڭعاي QR پايدالانۋشىلارىنا ارنايى ۇسىنىستار دايىنداپ جاتقانىن ايتتى. ونىڭ ايتۋىنشا، ءۇش بانك ءبىرىڭعاي QR ارقىلى تولەم كەزىندە ارنايى لويالدىق باعدارلامانى ىسكە اسىراتىنى انىق، ءتيىستى حابارلاندىرۋلار بۇگىن-اق پايدا بولۋى مۇمكىن.