قازاقستاننىڭ ۇلتتىق بانكى ءبىرىڭعاي QR-كودتى ەنگىزۋگە قاتىستى «ۇلتتىق بانك باسقارماسىنىڭ كەيبىر قاۋلىلارىنا وزگەرىستەر مەن تولىقتىرۋلار ەنگىزۋ تۋرالى» قاۋلى جوباسىن جاريا تالقىلاۋعا شىعاردى، دەپ حابارلايدى infohub.kz سايتى.
قۇجات «اشىق نقا» پورتالىندا جاريالانعان. جوبا قابىلدانعان زاڭدارعا سايكەس نورماتيۆتىك قۇقىقتىق اكتىلەرگە تۇزەتۋلەر ەنگىزۋدى كوزدەيدى. اتاپ ايتقاندا، «وڭالتۋ جانە بانكروتتىق تۋرالى» زاڭ اياسىندا ارەكەت ەتەتىن اكىمشىگە اعىمداعى شوت اشۋ ءۇشىن قاجەتتى قۇجاتتار تىزبەسى ناقتىلانادى، وعان بورىشكەردىڭ مۇلكىن ساتۋدان تۇسكەن قاراجات ەسەپتەلەتىن بولادى.
سونىمەن قاتار، وزگەرىستەر اليمەنتتەردى ءۇشىنشى تۇلعالاردىڭ ءوندىرىپ الۋىنان قورعاۋ تارتىبىنە قاتىستى. ۇلتتىق بانكتە بۇل شارا ازاماتتاردىڭ جاعدايىن جاقسارتۋعا باعىتتالعانىن ءتۇسىندىردى: كامەلەتكە تولماعان بالالار مەن ەڭبەككە قابىلەتسىز ادامداردى اسىراۋعا ارنالعان اليمەنت الۋشىلاردىڭ شوتتارى بانكتەردىڭ مەرزىمى وتكەن قارىزدار بويىنشا ءوندىرىپ الۋىنان عانا ەمەس، سوت ورىنداۋشىلارىنىڭ ءوندىرىپ الۋىنان دا قورعالاتىن بولادى.
سونداي-اق، بانكارالىق ءموبيلدى تولەمدەر جۇيەسىن دامىتۋ اياسىندا جۇيەنىڭ جاڭا سەرۆيستەرىن دامىتۋعا جانە جەكە تۇلعالار اراسىنداعى وپەراسيالار ءليميتىن ارتتىرۋعا باعىتتالعان وزگەرىستەر ەنگىزىلۋدە. ۇلتتىق بانك وكىلدەرىنىڭ ايتۋىنشا، بۇل بانكارالىق سەرۆيستەردىڭ حالىققا قولجەتىمدىلىگىن ارتتىرادى.
جوبا 1 قىركۇيەككە دەيىن جاريا تالقىلاۋعا شىعارىلعان.