حالىقارالىق «اقتوبە – ورال – رف شەكاراسى («سىرىم» وتكىزۋ پۋنكتى)» اۆتوجولىمەن ساپار شەگۋدى جوسپارلاپ جۇرگەن جۇرگىزۋشىلەرگە قوزعالىستىڭ ۋاقىتشا شەكتەلەتىنى تۋرالى ەسكەرتىلدى. شاعان وزەنىنىڭ ۇستىندەگى كوپىردى قالپىنا كەلتىرۋ جۇمىستارىنا بايلانىستى 26 شىلدەدە كولىكتىڭ بارلىق ءتۇرى ءۇشىن قوزعالىس التى ساعاتقا تولىق توقتاتىلادى، دەپ حابارلادى «قازاۆتوجول» ۇك» اق-نا سىلتەمە جاساعان infohub.kz سايتى.
جول قىزمەتىنىڭ حابارلاۋىنشا، جوندەۋ جۇمىستارى باتىس قازاقستان وبلىسىنداعى KAZ10 «اقتوبە – ورال – رف شەكاراسى («سىرىم» ءو/پ)» حالىقارالىق ماڭىزى بار اۆتوجولىنىڭ 247-شاقىرىمىندا ورنالاسقان شاعان وزەنىنىڭ كوپىرىندە جۇرگىزىلەدى.
«قالپىنا كەلتىرۋ جۇمىستارىنىڭ جۇرگىزىلۋىنە بايلانىستى 2026 جىلعى 26 شىلدەدە وسى ۋچاسكەدە بارلىق اۆتوكولىك قۇرالدارى ءۇشىن قوزعالىسقا ۋاقىتشا شەكتەۋ ەنگىزىلەدى. شەكتەۋلەر ساعات 05:00-دەن 11:00-گە دەيىن كۇشىندە بولادى»، – دەپ مالىمدەدى «قازاۆتوجول».
جۇرگىزۋشىلەرگە ساپارلارىن جوسپارلاۋ كەزىندە وزگەرىستەردى ەسكەرۋ، الدىن-الا بالاما باعىتتاردى تاڭداۋ جانە جوندەۋ جۇمىستارىنا بايلانىستى ۋاقىتشا قولايسىزدىقتاردى تۇسىنىستىكپەن قابىلداۋ ۇسىنىلادى.
قالپىنا كەلتىرۋ جۇمىستارى اياقتالعاننان كەيىن كوپىردەگى قوزعالىس ادەتتەگى رەجيمدە قايتا جانداندىرىلادى دەپ جوسپارلانۋدا.