باتىس قازاقستان وبلىسىندا 2026–2027 وقۋ جىلىنىڭ باسىندا سەگىز اۋىلدىڭ بالالارى جاڭا مەكتەپتەرگە يە بولدى. جەتى شاعىن جيناقتى وقۋ ورنى جەر قويناۋىن پايدالانۋشى كومپانيانىڭ قولداۋىمەن، تاعى بىرەۋى جەرگىلىكتى بيۋدجەت قاراجاتىنا سالىندى، دەپ حابارلايدى infohub.kz.
اقجايىق اۋدانىنداعى كەڭسۋات نەگىزگى ورتا مەكتەبىنىڭ جاڭا عيماراتىنىڭ اشىلۋ سالتاناتىنا وبلىس اكىمى ناريمان تورەعالييەۆ پەن «كپو ب.ۆ.» كومپانياسىنىڭ باس ديرەكتورىنىڭ ورىنباسارى مۇحتار مانكەيەۆ قاتىستى. كەڭسۋات اۋىلىندا 400-گە جۋىق ادام تۇرادى. ءوڭىر باسشىسى قازاقستان پرەزيدەنتىنىڭ تاپسىرماسى بويىنشا ءبىلىم بەرۋ ينفراقۇرىلىمىن دامىتۋ جۇمىستارى جۇيەلى تۇردە جالعاساتىنىن اتاپ ءوتتى.
«جۇيەلى جۇمىستىڭ ارقاسىندا وڭىردەگى 14 اۆاريالىق، 6 ءۇش اۋىسىمدى جانە 12 بەيىمدەلگەن مەكتەپ عيماراتىنىڭ ماسەلەلەرى تولىق شەشىلدى. وسى مەكتەپ قابىرعاسىنان ءوز ەلىنە قىزمەت ەتۋگە دايىن ءبىلىمدى، بىلىكتى، بەلسەندى ازاماتتار شىقسىن! جاڭا نىسان اۋىل ءۇشىن ءبىلىم مەن تاربيە وشاعىنا، دامۋ مەن جاڭا جەتىستىكتەرگە ۇمتىلىسقا اينالسىن!»، — دەدى بقو اكىمى ناريمان تورەعالييەۆ.
جاڭا مەكتەپ 60 ورىنعا ەسەپتەلگەن. بارلىق 10 وقۋ كابينەتى ينتەراكتيۆتى پانەلدەرمەن جابدىقتالعان. عيماراتتا شەبەرحانا، كىتاپحانا، اسحانا، اكت زالى جانە سپورت زالى بار.
ءبورلى اۋدانىنىڭ اقساي قالاسىنداعى №9 مەكتەپ «كەلەشەك مەكتەپتەرى» جوباسى اياسىندا سالىندى. جاڭا وقۋ جىلىندا نىسان 750 وقۋشىنى قابىلدادى. 34 سىنىپ قۇرىلىپ، 35-تەن استام پەداگوگ جۇمىسقا كىرىستى. سونىمەن قاتار، مەكتەپ 44 وقۋ كابينەتىمەن جابدىقتالعان. ولاردىڭ ىشىندە روبوتوتەحنيكا جانە STEM-زەرتحانالارى بار. سونداي-اق 150 ورىندىق اكت زالى جانە ءۇش سپورت زالى بار. «مەنىڭ بەيىنىم — فيزيكا-ماتەماتيكالىق جانە شىعارماشىلىق باعىت. مەن ينجەنەرلىك ماماندىققا تۇسكىم كەلەدى. بۇل مەكتەپ زاماناۋي تالاپتارعا ساي بولعاندىقتان، وسىندا وقىپ، جاقسى ءبىلىم الىپ، بولاشاقتا سۇرانىسقا يە مامان بولامىز دەپ ۇمىتتەنەمىن»، — دەيدى №9 وم وقۋشىسى بيبينۋر قىلىشبەك.
بايتەرەك اۋدانىنىڭ وزەرنوە اۋىلىندا 108 وقۋشىعا ارنالعان جاڭا مەكتەپ اشىلدى. ول «كپو ب.ۆ.» كومپانياسىنىڭ قاراجاتىنا سالىندى. 1961 جىلى سالىنعان ەسكى بەيىمدەلگەن عيمارات كوپتەن بەرى زامان تالابىنا جاۋاپ بەرمەيتىن. جاڭا وقۋ جىلىندا مۇندا 81 وقۋشى ءبىلىم الادى. تاسقالا اۋدانىنىڭ اينابۇلاق اۋىلىنداعى وقۋ ورنى 60 ورىنعا ەسەپتەلگەن. وسىلايشا، اۋىلداعى بۇرىنعى وقۋ ورنىنىڭ اۆاريالىق عيماراتى ماسەلەسى شەشىلدى. جالپى، وبلىس بويىنشا 2023 جىلدان باستاپ جالپى سىيىمدىلىعى 12 مىڭ وقۋشى ورنىن قۇرايتىن 38 جاڭا مەكتەپ سالىندى. ولاردىڭ 90 پايىزى اۋىلدىق جەرلەردە ورنالاسقان. جاڭا وقۋ جىلىندا وبلىستاعى وقۋشىلار سانى 128 مىڭعا جۋىقتادى. 11 مىڭنان استام بالا مەكتەپ تابالدىرىعىن العاش رەت اتتادى.