اۆتوسەرۆيس يەسى ءارى تانىمال YouTube-بلوگەر يليا سۆيريدوۆ بىرنەشە جىل ارمانداعان ديزەلدى Toyota Land Cruiser 100 ساتىپ الدى. ەندى ول 2001 جىلعى «جۇزدىكتى» جاي پايدالانىپ قانا قويماي، كولىكتى تولىق قالپىنا كەلتىرۋدى كوزدەپ وتىر. بۇل وقيعانىڭ تاعى ءبىر ەرەكشەلىگى — مۇنداي كولىكتەر قازاقستاندا ءالى دە سۇرانىسقا يە، دەپ حابارلايدى infohub.kz سايتى.
«كلۋبنىي سەرۆيس» YouTube-ارناسىنىڭ اۆتورى كولىكتى ىزدەۋگە كوپ ۋاقىت كەتكەنىن ايتتى. سوڭىندا ماماندار Land Cruiserء-دى سانكت-پەتەربۋرگتەن تاپقان. كولىك ءومىرىنىڭ كوپ بولىگىن قيىر سولتۇستىكتە وتكىزىپ، بلوگەردىڭ ايتۋىنشا، كوپتەگەن رەاگەنتتەن امان قالعان.
حابارلاندىرۋدا ۆنەدوروجنيك 2،9 ملن رۋبل (شامامەن 15،3 ملن تەڭگە) تۇرعان، ءبىراق كەلىسسوزدەن كەيىن ونى 2،6 ملن رۋبلگە (≈13،8 ملن تەڭگە) بەرگەن. ىرىكتەۋ كەزىندە ماماندار سەگىز-توعىز كولىكتى قاراپ شىققان، ال ولاردىڭ قىزمەتى شامامەن 200 مىڭ رۋبلگە (≈1،1 ملن تەڭگە) تۇسكەن.
باستى ولشەم — كولىكتىڭ جاي-كۇيى بولدى. 25 جىلدىق «كرۋزاكتىڭ» ءتۇپنۇسقا ەسىكتەرى، تابالدىرىقتارى، شاناق ەلەمەنتتەرى جانە زاۋىتتىق تەرىمەن قاپتالعان سالونى ساقتالعان. راماسى دا جاقسى كۇيدە، تەك بەتكى ازداعان كورروزياسى بار.
«بۇل وقيعاداعى ەڭ باستىسى – جاقسى كورىپ، ايالاپ، ساقتاپ قالعان نارسەنى تابۋ»، — دەپ مويىندادى بلوگەر.
ساتىپ الىنعان ۆنەدوروجنيك 204 ات كۇشى بار 4،2 ليترلىك ديزەلدى قوزعالتقىشپەن جابدىقتالعان. وندا كليرەنستى رەتتەيتىن گيدروپودۆەسكا، امورتيزاتورلاردىڭ قاتتىلىعىن رەتتەۋ، ورتالىق جانە ارتقى ديففەرەنسيالداردىڭ بۇعاتتالۋى جانە تومەندەتكىش بەرىلىس بار.
سۆيريدوۆ سالوننىڭ كۇيىن بولەك اتاپ ءوتتى. ءتۇپنۇسقا تەرى شيرەك عاسىردان كەيىن دە ساقتالعان، ال قوراپ، رازداتكا جانە تورسيوندار وزىندەي قالعان. جالعىز بايقالاتىن ماسەلە – ازىرگە ىستەمەيتىن ارتقى بۇعاتتاۋ.
«بۇل، مەنىڭ ويىمشا، Toyota كومپانياسىنىڭ تاريحىنداعى ەڭ ۇزدىك Toyota Land Cruiser»، — دەپ ەسەپتەيدى سۆيريدوۆ.
ەندى Land Cruiser 100ء-دى تولىق قالپىنا كەلتىرۋ جوسپارلانىپ وتىر: كولىكتى بولشەكتەپ، راماسىن قۇمداپ، قايتا بويايدى، شاناعىن، اسپاسىن، سالونىن جانە اگرەگاتتارىن رەتكە كەلتىرەدى. سۆيريدوۆ جوندەۋدەن كەيىن «جۇزدىك» جاڭاداي كورىنىپ، ءبىراق ءتۇپنۇسقا ءتۇرىن ساقتاۋىن قالايدى.
قازاقستاندا دا بۇل مودەلگە قىزىعۋشىلىق ساقتالىپ وتىر. ماتەريال دايىندالعان ساتتە Kolesa.kz-تە 1998–2007 جىلدارداعى Land Cruiser 100 تۋرالى 463 حابارلاندىرۋ بولدى. ال جالپى «كرۋزاكتار» بويىنشا — 2 مىڭنان استام ۇسىنىس.
سونىمەن قاتار «جۇزدىكتەردىڭ» باعاسى كۇيىنە قاتتى بايلانىستى. اۆتوردىڭ ءوزى شامامەن 3،5-تەن 8 ملن رۋبلگە دەيىنگى (شامامەن 18،5–42،3 ملن تەڭگە) ارالىقتى اتايدى. بىزدە قولجەتىمدى نۇسقالار دا كەزدەسەدى: مىسالى، 4.2 ديزەلى بار 2001 جىلعى Land Cruiser 100 7 ملن تەڭگەگە ساتىلىپ جاتىر.
بۇعان دەيىن كۋرسيۆ اۆتو نارىقتىڭ تومەنگى جاعىنداعى Land Cruiser 200 قالاي ءقاۋىپتى تۇزاققا اينالۋى مۇمكىن ەكەنىن جازعان بولاتىن.