TikTok-تا 2،3 ملن-نان استام جازىلۋشىسى بار بەلگىلى بلوگەر ينتەرنەتتە ءوزى قاتىسقان ۆيدەو پايدا بولعاننان كەيىن جاۋاپكەرشىلىككە تارتىلدى، دەپ حابارلايدى infohub.kz.
«Kozachkov offside» Telegram ارناسىندا ماڭعىستاۋ وبلىسىندا قىزداردىڭ وزدەرىنىڭ قۇقىق بۇزۋشىلىقتارى تۇسىرىلگەن ۆيدەونى ينتەرنەتكە جۇكتەگەنى تۋرالى حابارلاما جاريالاندى. جازبادا: «ماڭعىستاۋ وبلىسىنىڭ جولدارىندا شاپقىلاپ جۇرگەن قىزدارعا ءوز قۇرمەتىمدى بىلدىرگىم كەلەدى. ولار وزدەرىنىڭ قۇقىق بۇزۋشىلىقتارىن ۆيدەوعا ءتۇسىرىپ، جۇكتەدى، ياعني وزدەرىنىڭ ازاماتتىق ۇستانىمىن جانە زاڭ بۇزۋشىلىققا توزبەۋشىلىگىن كورسەتتى»، — دەلىنگەن.
جازباعا Instagram جانە TikTok-تا تانىمال، Nagidollayevna لوگينىمەن كونتەنت جاريالايتىن جانۋليا ەسىمدى بلوگەردىڭ ۆيدەو تىركەلگەن. ونىڭ Instagram-دا 410 مىڭنان استام، ال TikTok-تا 2،3 ملن جازىلۋشىسى بار.
infohub.kz ءتىلشىسى ماڭعىستاۋ وبلىسى پوليسيا دەپارتامەنتىنىڭ ءباسپاسوز قىزمەتىنە سۇراۋ جولدادى. الەۋمەتتىك جەلىلەردى باقىلاۋ بارىسىندا پوليسيا قىزمەتكەرلەرى جۇرگىزۋشىلەردىڭ جولاۋشىلاردى قاۋىپسىزدىك تالاپتارىن بۇزا وتىرىپ تاسىمالداپ، جول ءجۇرۋ ەرەجەسىن ورەسكەل بۇزعان ۆيدەو جازبالارىن انىقتاعانى بەلگىلى بولدى.
«جۇرگىزۋشىلەردىڭ جەكە باسى انىقتالدى. ولار جولاۋشىلاردى تاسىمالداۋ كەزىندە جول ءجۇرۋ ەرەجەسىنىڭ تالاپتارىن ساقتاماعانى، ءجۇرىس الدىندا جانە مانەۆر جاساۋ كەزىندە سيگنال بەرۋ تالابىن ورىنداماعانى، سونداي-اق كولىك قوزعالىسىنا كەدەرگى كەلتىرگەنى ءۇشىن اكىمشىلىك جاۋاپكەرشىلىككە تارتىلدى. سونىمەن قاتار، كولىكتە بولعان جولاۋشىلاردىڭ جەكە باسى انىقتالدى. ولارعا دا قولدانىستاعى زاڭناماعا سايكەس شارا قولدانىلادى»، — دەپ حابارلادى پوليسيادان.
كولىك قۇرالدارى مامانداندىرىلعان ايىپپۇل تۇراعىنا ورنالاستىرىلدى.