قازاقستاندىق سپورتشىلار نارگيزا بولاتوۆا مەن ياسمين تۋياكوۆا كوركەم جۇزۋدەن 2026 جىلعى ازيا ويىندارىندا ەل قورجىنىنا العاشقى مەدال سالدى. ولار ايەلدەر دۋەتى باسەكەسىندە ءۇشىنشى ورىنعا تۇراقتادى، دەپ حابارلايدى infohub.kz سايتى.
تەحنيكالىق باعدارلامادان كەيىن قازاقستاندىق دۋەت نەبارى ءتورتىنشى ورىندا كەلە جاتقان. الايدا ەركىن باعدارلاما قورىتىندىسى بويىنشا سپورتشىلار وزبەكستاندىق قارسىلاستارىنان باسىم ءتۇسىپ، تۇعىرعا كوتەرىلدى.
جالپى ەسەپتە بولاتوۆا مەن تۋياكوۆا 565،7326 ۇپاي جيناپ، قولا جۇلدەگە قول جەتكىزدى. ازيادا-2026 چەمپيوندارى اتانعان جۇڭگو وكىلدەرى لين يانسزيۋن مەن سيۋي حۋەييان 640،3576 ۇپايمەن مارەگە جەتتى. كۇمىستى جاپونيالىق موە حيگا مەن توموكا ساتو 601،5566 ۇپايمەن جەڭىپ الدى.
ياسمين تۋياكوۆا ءۇشىن بۇل — ازيا ويىندارىنداعى دۋەت باسەكەسىندەگى ەكىنشى قولا جۇلدە. بۇعان دەيىن ول حانچجوۋ-2022-دە ارينا پۋشكينامەن بىرگە وسى مەدالدى يەلەنگەن ەدى. سول جولى قازاقستان قۇراماسى كوماندالىق تۋرنيردە دە ءۇشىنشى ورىن العان، وندا بولاتوۆا مەن تۋياكوۆا دا ونەر كورسەتتى.
ازيادا-2026-دا كوركەم جۇزۋدەن تاعى ءبىر مەدال جيىنتىعى ساراپقا سالىنادى. 27 قىركۇيەكتە قازاقستان قۇراماسى ارالاس كوماندالار باسەكەسىندە تەحنيكالىق باعدارلامانى، ال كەلەسى كۇنى ەركىن باعدارلامانى ۇسىنادى.