بولگاريا بيلىگى جەكەمەنشىك قورعانىس كومپانياسىنا تيەسىلى ءوق-دارى قويماسىندا تۇندە شىققان ءورتتىڭ سەبەبىن تەرگەپ جاتىر. ىشكى ىستەر ءمينيسترى يۆان دەمەردجيەۆتىڭ ايتۋىنشا، بيلىك ورتالىق بولگارياداعى وقيعاعا «سىرتقى ارالاسۋدى جوققا شىعارمايدى». ورتتەن ەشكىم زارداپ شەكپەدى، الايدا تىزبەكتەي جارىلىستار بولعان. بۇل تۋرالى infohub.kz سايتى حابارلايدى.
ۋكراينا باسقىنشى رەسەي كۇشتەرىنە قارسى قولدانىپ جۇرگەن قارۋىن شىعاراتىن EMCO كومپانياسى ءوز نىسانىنداعى ءورتتى ديۆەرسيا دەپ اتاپ، ادام فاكتورىن «تولىق جوققا شىعاردى». الايدا كىمنىڭ جاۋاپتى بولۋى مۇمكىن ەكەنىن ناقتىلامادى.
بۇل وقيعا وتكەن ايدا سول وڭىردەگى EMCO-نىڭ تاعى ءبىر ءوق-دارى قويماسىندا بولعان ءورت پەن جارىلىستاردان كەيىن تىركەلدى. كومپانيا مالىمدەمەسىندە بۇل جولى ورتەنگەن قويما — استانا سوفيادان شامامەن 170 شاقىرىم شىعىستا، ورتالىقتاعى گورني ۆىرپيشتا اۋىلىنىڭ ماڭىندا — بىرنەشە اي بويى پايدالانىلماعانىن، ال 20 كۇن بۇرىن تەكسەرىلىپ، بارلىق تالاپتارعا تولىق سايكەستىگى راستالعانىن اتاپ ءوتتى.
EMCO 2011 جىلدان بەرى بولگار قورعانىس كاسىپورىندارىندا ورىن العان ءبىرقاتار ۇقساس وقيعالاردى مىسالعا كەلتىرىپ، سوڭعىسى «بولگار قورعانىس ونەركاسىبىنە قارسى ديۆەرسيا ارەكەتتەرى قاتارىنان تىس قالماعانىن» مالىمدەدى.
«وسىنداي ارەكەتتەردەن ەڭ اۋىر زارداپ شەككەن ەۋرووداق پەن ناتو-عا مۇشە مەملەكەت رەتىندە بولگاريا بۇل شابۋىلداردىڭ الدىن الۋ مەن ولاردى زالالسىزداندىرۋ جونىندەگى ۇجىمدىق كۇش-جىگەرگە قوسىلۋى ءتيىس»، — دەلىنگەن كومپانيا مالىمدەمەسىندە.
كومپانيانى بولگار قارۋ ساتۋشىسى ەميليان گەبريەۆ باسقارادى. بولگاريا پروكۋراتۋراسى ونىڭ بۇرىن دا رەسەيلىك اگەنتتەردىڭ نىساناسىنا اينالعانىن العا تارتادى. اتاپ ايتقاندا، 2015 جىلى گەبرەۆتى، ونىڭ ۇلىن جانە كومپانيانىڭ تاعى ءبىر قىزمەتكەرىن ۋلاۋ ارەكەتى بولعان — كەيىن ءۇش رەسەيلىك ازاماتقا ولتىرۋگە وقتالۋ بويىنشا سىرتتاي ايىپ تاعىلدى.
بولگاريا — 2022 جىلى باستالعان تولىق اۋقىمدى رەسەيلىك باسقىنشىلىققا تويتارىس بەرىپ جاتقان ۋكرايناعا قارۋ-جاراقتىڭ ءىرى جەتكىزۋشىسى. سوفيا جاقىندا مەملەكەتتىك قارۋ جەتكىزۋىن توقتاتقانىمەن، بولگار جەكەمەنشىك قورعانىس كومپانيالارى مۇنداي تاسىمالداردى جالعاستىرىپ وتىر.
رەسەي سوڭعى كەزدە ەۋروپا بويىنشا ديۆەرسيالىق ناۋقانىن كۇشەيتكەن سياقتى. وتكەن اپتادا گەرمانيا تامىزدا لەيپسيگ اۋەجايىندا بولعان درون شابۋىلىنا رەسەي جاۋاپتى دەپ مالىمدەدى — ماسكەۋ بۇل ايىپتى «ابسۋرد» دەپ جوققا شىعاردى.
يتاليادان ەستونياعا دەيىنگى قورعانىس نىساندارىندا دا ءبىرقاتار كۇدىكتى ءورت ورىن الدى، زارداپ شەككەن كەيبىر ەلدەر رەسەيدى ايىپتاپ وتىر.