بولگاريا ۋكراينا ەلشىسىن تۇسىنىكتەمە بەرۋگە شاقىرتتى. بۇل — رۋمىنيامەن شەكاراداعى ترانسبالكان گاز قۇبىرىنىڭ كومپرەسسورلىق ستانسياسىنىڭ ماڭىندا ۇشقىشسىز ۇشۋ اپپاراتى قۇلاپ، جارىلعان وقيعاعا بايلانىستى. بولگاريا بيلىگى درون ۋكرايناعا تيەسىلى بولۋى مۇمكىن دەپ بولجاپ وتىر، دەپ حابارلايدى infohub.kz.
بولگاريا ۇلتتىق تەلەارناسىنىڭ (بنت) مالىمەتىنشە، بولگاريا سىرتقى ىستەر ءمينيسترىنىڭ ۋكراينا ەلشىسى ولەسيا يلاششۋكپەن كەزدەسۋى دۇيسەنبى، 10 تامىزعا جوسپارلانعان.
ەل بيلىگىنىڭ دەرەگىنشە، ۇشقىشسىز ۇشۋ اپپاراتى بولگاريانىڭ اۋە كەڭىستىگىنە رۋمىنيا جاعىنان كىرىپ، ترانسبالكان گاز قۇبىرىنىڭ كومپرەسسورلىق ستانسياسىنان شامامەن ءبىر شاقىرىم جەردە جارىلعان. نىسان بۇرىنعى «كاردام» شەكارا بەكەتىنىڭ ماڭىندا ورنالاسقان.
بولگاريا قورعانىس مينيسترلىگى بۇل ۋكراينالىق «مايا» درون-تۇزاعى بولۋى مۇمكىن دەگەن بولجام ايتتى. سونىمەن قاتار، ەل بيلىگى دروننىڭ بولگاريا اۋماعىنا ادەيى باعىتتالعان دەپ سانامايدى.
ۋكراينا تاراپىنىڭ جاۋابى
ۋكراينا سىرتقى ىستەر مينيسترلىگى ۋكراينالىق اسكەريلەردىڭ بولگارياعا ەشقانداي ۇشقىشسىز ۇشۋ اپپاراتىن ادەيى باعىتتاماعانىن مالىمدەدى.
«ۋكراينا قورعانىس كۇشتەرى بولگارياعا ەشقانداي قۇرالدى ادەيى باعىتتاعان جوق»، — دەدى ۋكراينا ءسىم رەسمي وكىلى گەورگي تيحي.
كييەۆ سونداي-اق، قۇلاعان درون شىنىمەن ۋكرايناعا تيەسىلى بولسا، وقيعانىڭ بارلىق ءمان-جايىن انىقتاۋ ءۇشىن سوفيامەن ىنتىماقتاسۋعا دايىن ەكەنىن ءبىلدىردى.
بولگاريا ستراتەگيالىق نىسانداردىڭ قورعانىسىن كۇشەيتەدى
درون قۇلاعاننان كەيىن بولگاريا ۇكىمەت باسشىسى رۋمەن راديەۆ قاۋىپسىزدىك كەڭەسىنىڭ كەزەكتەن تىس وتىرىسىن شاقىردى.
ونىڭ ايتۋىنشا، ۇشقىشسىز ۇشۋ اپپاراتىن رۋمىنيادا دا، بولگاريادا دا راديولوكاسيالىق باقىلاۋ قۇرالدارى ۋاقىتىندا انىقتاي الماعان. راديەۆ بۇل وقيعا تومەن ۇشاتىن نىسانداردى انىقتاۋ مۇمكىندىكتەرىن كۇشەيتۋ قاجەتتىگىن تاعى ءبىر رەت كورسەتكەنىن ايتتى.
بولگاريا بيلىگى ستراتەگيالىق نىسانداردىڭ كۇزەتىن كۇشەيتىپ، دروندارعا قارسى كۇشتەردى قايتا ورنالاستىرۋدى جوسپارلاپ وتىر.
2026 جىلدىڭ ماۋسىمىندا بولگاريا ۋكرايناعا اسكەري كومەك كورسەتۋدى توقتاتقان بولاتىن. ەل بيلىگى بۇل شەشىمدى رەسەي-ۋكراين سوعىسىن توقتاتۋ جونىندەگى ديپلوماتيالىق كۇش-جىگەردى قولداۋمەن ءتۇسىندىردى.