بوليۆياداعى اسكەري كازارمادا بولعان جارىلىستان كەمىندە ەكى ادام قازا تاۋىپ، ونداعان ادام جاراقات الدى. بۇل تۋرالى infohub.kz سايتى حابارلايدى.
جارىلىس جەرگىلىكتى ۋاقىت بويىنشا جۇما كۇنى ساعات 14:30-دا (گرينۆيچ بويىنشا 18:30) ۆياچا قالاسىنداعى ارتيللەريالىق پولك ورنالاسقان كازارمادا بولدى. بوليۆيانىڭ قورعانىس ءمينيسترى ەرنەستو حۋستينيانونىڭ مالىمەتىنشە، جارىلىس "پيروتەحنيكالىق ماتەريالداردىڭ" تۇتانۋىنان ورىن العان. قازىرگى ۋاقىتتا كەمىندە 58 ادام جاراقات العانى بەلگىلى.
دەنساۋلىق ساقتاۋ مينيسترلىگىنىڭ وكىلى ريتا نەبراسكا جەرگىلىكتى تەلەارناعا بەرگەن سۇحباتىندا قازا تاپقاندار سانى 10-15 ادامعا جەتۋى مۇمكىن ەكەنىن ايتتى. بۇل اقپاراتتى Reuters اگەنتتىگى تاراتتى. جارىلىس لا-پاستان شامامەن 30 شاقىرىم جەردە ورنالاسقان ۆياچا قالاسىندا بولدى.
پوليسيانىڭ حابارلاۋىنشا، جارىلىس سالدارىنان ونداعان ءۇي زاقىمدانعان، نەگىزىنەن تەرەزەلەر سىنعان. قۇتقارۋشىلار قيراعان ۇيىندىلەر استىنان ادامداردى ىزدەستىرۋ جۇمىستارىن جۇرگىزۋدە. نەبراسكا تاعى دا جارىلىس بولۋ ءقاۋپى بار ەكەنىن ەسكەرتىپ، تۇرعىنداردى اسكەري بازادان كەمىندە 150 مەتر قاشىقتىقتا بولۋعا شاقىردى.
پوليسيا وكىلى رودجەر روكانىڭ AFP اگەنتتىگىنە ايتۋىنشا، كازارمادا فەيەرۆەركتەر ساقتالعان، جارىلىستىڭ سەبەبى ءالى تەرگەلۋدە. ۆياچا بيلىگى ءۇش كۇندىك ازا تۇتۋ جاريالادى.