ۋەلستىڭ تەڭىز جاعالاۋىنداعى اۋىلىندا جۇزدەگەن جانكۇيەر ءانشى بونني تايلەردىڭ مايىتىمەن قوشتاسۋ ءۇشىن كوشەگە شىقتى. بۇل تۋرالى infohub.kz سايتى حابارلايدى.
گرەممي سىيلىعىنا ۇمىتكەر بولعان ۋەلستىك پوپ-جۇلدىز 1983 جىلى الەمدىك حيتكە اينالعان «Total Eclipse of the Heart» انىمەن تانىمال. ول وتكەن ايدا پورتۋگالياداعى اۋرۋحانادا قايتىس بولدى. بونني تايلەرگە 75 جاس ەدى.
تايلەر مامىر ايىندا فارۋ قالاسىنداعى ۇيىندە ىشەككە شۇعىل وتا جاساتقان بولاتىن. سودان بەرى ونىڭ دەنساۋلىعى ناشارلاپ، كوز جۇمدى. سۋونسي قالاسىنا جاقىن ورنالاسقان مامبلس اۋىلىنىڭ كوشەلەرىنە جەرگىلىكتى تۇرعىندار مەن ۇلىبريتانيانىڭ تۇكپىر-تۇكپىرىنەن كەلگەن جانكۇيەرلەر جينالدى. ولار ۋەلس تۋىمەن جابىلعان ءمايىت سالىنعان اربانى كورۋ ءۇشىن كەلدى. كوپتەگەن ادام ءانشىنىڭ بۇرىنعى ءۇيىنىڭ الدىندا كۇتىپ، گۇل شوقتارىن قويدى.
«ول ءارقاشان ۇيىنە، ۋەلستەگى جانكۇيەرلەرىنە ورالاتىن. ونىڭ اندەرى ۋەلستەگى كوپتەگەن ادامنىڭ جۇرەگىنە جول تاپتى؛ ءبىز ونى قاتتى جاقسى كوردىك»، — دەدى 18 جاستاعى كەريس ەدۆاردس.
بونني تايلەر شىن اتى گەينور حوپكينس، سۋونسيدەن شامامەن 11 شاقىرىم جەردەگى سكيۋەندە كومىر شاحتەرىنىڭ وتباسىندا دۇنيەگە كەلگەن. ول ءۇش اپكەسى مەن ەكى اعاسىمەن بىرگە ءوستى. ءانشى گرەممي سىيلىعىنا ءۇش رەت ۇمىتكەر بولعان، 2013 جىلى ەۋروۆيدەنيە ءان بايقاۋىندا ۇلىبريتانيانى تانىستىرىپ، 19-ورىنعا يە بولعان. 2022 جىلى بريتان يمپەرياسى وردەنىنىڭ مۇشەسى اتاعىن العان. بۇل اتاققا ول نەگىزىنەن «Total Eclipse of the Heart» ءانى ارقىلى يە بولدى. بۇل باللادا ۇلىبريتانيا مەن اقش-تاعى چارتتاردىڭ كوشىن باستاپ، 1 ميللياردتان استام رەت تىڭدالعان. ءاننىڭ تانىمالدىلىعىنا 2017، 2024 جىلدارداعى جانە بيىلعى اپتاداعى كۇن تۇتىلۋى دا اسەر ەتكەن.
تايلەر «It's a Heartache» جانە «Footloose» ءفيلمىنىڭ ساۋندترەگىنەن «Holding Out For a Hero» سياقتى باسقا دا حيتتەرىمەن تانىمال بولدى.
ءانشىنىڭ ومىرىنە ارنالعان ەسكە الۋ شاراسى دۇيسەنبى كۇنى سۋونسيدەگى شىركەۋدە وتەدى. ودان كەيىن ونىڭ ءمايىتى تۋعان جەرى سكيۋەن ارقىلى سوڭعى ساپارعا اتتانادى.