Қарағанды облысында екі жасар баланың үстіне қасбеттің қаптамасы құлаған мәдениет үйі жабылды. Бала үш айдан кейін қаза тапты, ал ғимаратқа техникалық сараптама тек күзде ғана басталды, деп хабарлайды infohub.kz сайты.
Қайғылы оқиға 13 сәуірде болды. Дәрігерлер үш ай бойы баланың өмірі үшін күресті, бірақ шілдеде ол көз жұмды. Осы уақыттың бәрінде ғимарат жұмысын жалғастырды. Енді Ботақара кентіндегі мәдениет үйінің жабылғаны белгілі болды. Ғимаратта техникалық сараптама тек жарты жылдан кейін ғана жүргізілді.
Қаза тапқан сәбидің ата-анасы осы жарты жыл бойы өзге біреу зардап шекпесін деп ғимаратты жабуға сұрады. Бірақ мәдениет үйі жұмысын тоқтатқан жоқ. Тергеу аяқталғанша ғимаратты жөндеуге болмайды. Алайда сараптама тек 2 қазанда басталды. Қаза тапқан Әмірдің анасы Сабина Қауапованың айтуынша, оған сарапшы бірде демалыста, бірде еңбек демалысында деп жауап берілген.
«Неге бұның бәрі сонша ұзаққа созылып жатыр? Бұған ешкім жауап бермейтін сияқты. Менің балам, білмеймін, қандай да бір шығын материалы сияқты. Қайтыс болды — ештеңе етпейді, ештеңе жасамаймыз, басқа құрбандарды күтеміз. Әлде олардың жағынан мұны қалай түсіну керек?» — дейді қаза тапқан баланың анасы Сабина Қауапова.
Директордың адвокаты сарапшы бүкіл облысқа бір-ақ адам екенін, шынында да үнемі жол жүріп жүргенін айтты. Ол тексеруді тек 2 қазанда жүргізді. Қорытынды әлі жоқ. Ғимаратта ағымдағы жөндеу 2022 жылы жүргізіліп, мердігерге шамамен 65 млн теңге төленген. Бірақ кепілдік мерзімі әлі бітпей жатып қаптама түсе бастады.
«Мердігер телефон қоңырауларына жауап беруді қойды, ал соңғы қоңырауға мәдениет үйінің өкіліне жауап беріп, қазіргі сәтте оның ұйымы таратылып, қызметін тоқтатқанын түсіндірді», — деп атап өтті Ботақара кентіндегі мәдениет үйі директорының адвокаты Ерлан Байділдинов.
Алайда мәдениет үйінде техникалық тексеру жүргізіліп, қорытынды алынды. Онда ғимарат апатты емес, ал травертин кесектері жел мен жекелеген учаскелердегі сапасыз монтаждау салдарынан құлағаны көрсетілген. Жалпы алғанда қасбет жақсы жағдайда. Жуырда көптеген өтініштен кейін мәдениет үйінің жабылғаны белгілі болды.
«Азаматтардың қауіпсіздігі үшін және құрылыс-техникалық сараптама жүргізу мақсатында мәдениет үйінің қызметі уақытша тоқтатылып, ғимаратқа кіру шектелді. Қазіргі таңда қажетті тергеу әрекеттері жүргізілуде», — деп атап өтті Бұқар жырау ауданы полиция басқармасы бастығының орынбасары Асқар Баспақов.
Адвокаттың айтуынша, мәдениет үйінің директоры баланың қаза табуына байланысты оқиғаны ауыр қабылдап, осы уақыт ішінде тіпті жүрегіне 2 операция жасатқан. Алайда оның лауазымдық нұсқаулықтарында мәдениет үйіне келушілердің жарақат алуы үшін жауапкершілік қарастырылмаған. Қаза тапқан баланың ата-анасы болашақта мәдениет үйінен моральдық зиянның өтемақысын өндіріп алуды жоспарлап отыр.