ماڭعىستاۋ وبلىسىندا كاسپيدەگى وقۋ-جاتتىعۋ كەزىندە قازا تاپقان، زارداپ شەككەن جانە حابار-وشارسىز كەتكەن اسكەري قىزمەتشىلەر تۋرالى دەرەكتەر ناقتىلاندى. سوڭعى مالىمەت بويىنشا، اۋا رايى قولايسىز كەزدە اشىق تەڭىزگە 17 ادام اعىزىلىپ كەتكەن. ولاردىڭ 12ء-سى قازا تاپتى، ۇشەۋىن قۇتقارۋ مۇمكىن بولدى، تاعى ەكەۋىنىڭ ورنى ازىرگە بەلگىسىز، دەپ حابارلايدى infohub.kz سايتى.
پرەمەر-مينيستردىڭ ورىنباسارى قانات بوزۋمبايەۆ باسقارعان ۇكىمەتتىك كوميسسيا توتەنشە جاعداي ورنىندا جۇمىسىن باستاپ كەتتى. ءقازىر ول ىزدەۋ جۇمىستارىن ۇيلەستىرىپ وتىر.
«قانات بوزۋمبايەۆ جوعالعان اسكەري قىزمەتشىلەردى بارلىق قاجەتتى كۇش پەن قۇرالدى تارتا وتىرىپ، تاۋلىك بويى ۇزدىكسىز ىزدەۋدى قامتاماسىز ەتۋدى تاپسىردى. سونداي-اق قازا تاپقان اسكەريلەردىڭ وتباسىلارىنا قاجەتتى ماتەريالدىق جانە وزگە دە كومەك كورسەتۋ تاپسىرىلدى»، — دەدى ماڭعىستاۋ وبلىسى اكىمدىگىندە.
قايعىلى وقيعانىڭ حرونيكاسى بىلاي: 24 قىركۇيەكتە اسكەري قىزمەتشىلەر كاسپي تەڭىزىنىڭ جاعالاۋىندا وقۋ-جاۋىنگەرلىك تاپسىرمانى ورىنداپ جاتتى. قورعانىس مينيسترلىگىنىڭ دەرەگىنشە، اۋا رايى كۇرت ناشارلاپ، جەل كۇشەيگەن. اسكەريلەردى اشىق تەڭىزگە اعىزىپ اكەتكەن.
قۇتقارىلعان ءۇش اسكەريدىڭ بىرەۋى ماڭعىستاۋ وبلىستىق كوپبەيىندى اۋرۋحاناسىنا جەتكىزىلدى. دارىگەرلەر ونىڭ جاعدايىن تۇراقتى اۋىر دەپ باعالاپ وتىر.
اسكەري قىزمەتشىلەردىڭ قازا تابۋ فاكتىسى بويىنشا قىلمىستىق ءىس قوزعالدى. پرەزيدەنت قاسىم-جومارت توقايەۆ ولاردىڭ تۋعان-تۋىستارىنا كوڭىل ايتىپ، 25 قىركۇيەكتى جالپىۇلتتىق ازا تۇتۋ كۇنى دەپ جاريالادى.