ۆيسە-پرەمەر قانات بوزۋمبايەۆ باستاعان ۇكىمەتتىك كوميسسيا مانعىستاۋ وبلىسىنا كەلدى. ول پرەزيدەنتتىڭ تاپسىرماسىمەن اسكەري قىزمەتشىلەردىڭ وقۋ-جاتتىعۋ كەزىندە قازا تابۋ ءمان-جايىن تەرگەۋ ءۇشىن قۇرىلعان، دەپ حابارلايدى infohub.kz سايتى.
كوميسسيا قۇرامىنا قورعانىس ءمينيسترى، وبلىس اكىمى، باس اسكەري پروكۋرور، شەكارا قىزمەتىنىڭ وكىلدەرى جانە التى مينيسترلىكتىڭ باسشىلارى ەندى. ولار وقيعا ورنىنداعى احۋالدى زەرتتەپ، مەملەكەتتىك ورگانداردىڭ بۇدان كەيىنگى ءىس-قيمىلىن ايقىنداۋى ءتيىس.
«قازا تاپقانداردىڭ وتباسىلارىنا قاجەتتى كومەك كورسەتۋگە، بولعان وقيعانىڭ ءمان-جايىن انىقتاۋعا، سونداي-اق تارتىلعان مەملەكەتتىك ورگاندار مەن قىزمەتتەردىڭ ءىس-قيمىلىن ۇيلەستىرۋگە ەرەكشە نازار اۋدارىلادى. كوميسسيا جۇمىسى وقيعا ورنىندا جالعاسۋدا»، — دەلىنگەن وبلىس اكىمدىگىنىڭ حابارلاماسىندا.
قايعىلى وقيعا 24 قىركۇيەكتە كاسپي تەڭىزىنىڭ جاعالاۋىندا اسكەري-تەڭىز كۇشتەرىنىڭ اسكەري قىزمەتشىلەرى وقۋ-جاۋىنگەرلىك تاپسىرمانى ورىنداپ جاتقاندا بولدى. قورعانىس مينيسترلىگىنىڭ دەرەگىنشە، اۋا رايى كۇرت ناشارلاپ، قاتتى جەل تۇرىپ، 19 ادام تەڭىزگە ۇشىپ كەتكەن.
ۆەدومستۆو توعىز اسكەري قىزمەتشىنىڭ قازا تاپقانىن حابارلادى. ۇشەۋىن قۇتقارىپ قالۋ مۇمكىن بولدى، ولاردىڭ بىرەۋى اۋرۋحاناعا جات قىزىلدى. قالعاندارىن ىزدەۋ جالعاستى. وپەراسياعا اسكەري تەڭىزشىلەر، تجم قۇتقارۋشىلارى جانە اۆياسيا قاتىستى.
اسكەريلەردىڭ قازا تابۋى بويىنشا قىلمىستىق ءىس قوزعالدى. تەرگەۋشىلەر بولعان وقيعانىڭ ءمان-جايىن انىقتاپ، ساراپتامالار جۇرگىزۋدە. پرەزيدەنت قاسىم-جومارت توقايەۆ قازا تاپقانداردىڭ وتباسىلارىنا كوڭىل ايتتى. 25 قىركۇيەكتى جالپىۇلتتىق ازا تۇتۋ كۇنى دەپ جاريالادى.