قازاقستان پرەمەر-مينيسترىنىڭ ورىنباسارى قانات بوزىمبايەۆ كاسپي تەڭىزىندەگى قايعىلى وقيعاعا كىنالى بارلىق لاۋازىمدى تۇلعالار جازاعا تارتىلاتىنىن مالىمدەدى، دەپ حابارلايدى infohub.kz سايتى.
قازاقستان رەسپۋبليكاسى پرەمەر-مينيسترىنىڭ ورىنباسارى قانات بوزىمباەۆتىڭ رەسمي مالىمدەمەسى ماڭعىستاۋ وبلىسى اكىمدىگىنىڭ Telegram-ارناسىندا جاريالاندى.
«بۇگىن ەلىمىز اۋىر قازاعا ۇشىرادى. ماڭعىستاۋ وبلىسىنداعى قايعىلى وقيعا سالدارىنان 12 اسكەري قىزمەتشىمىز قازا تاپتى، ۇشەۋىن امان الىپ قالۋ مۇمكىن بولدى، قالعان ەكەۋىن ىزدەۋ جالعاسۋدا. مەملەكەت باسشىسى قاسىم-جومارت كەمەل ۇلى توقايەۆ قازا تاپقان ساربازدار مەن وفيسەرلەردىڭ وتباسىلارىنا، تۋعان-تۋىستارىنا تەرەڭ ءارى شىنايى كوڭىل ايتادى. پرەزيدەنت پەن بۇكىل قازاق حالقى سىزدەردىڭ ورنى تولماس قايعىلارىڭىزدى بولىسەدى»، — دەدى بوزىمبايەۆ.
ول بولعان وقيعاعا بايلانىستى ۋاكىلەتتى ورگاندار قىلمىستىق ءىس قوزعاعانىن ەسكە سالدى. ونىڭ ايتۋىنشا، تەرگەۋ بارىنشا مۇقيات، وبەكتيۆتى جانە قىسقا مەرزىمدە جۇرگىزىلەدى.
«ارەكەتى نەمەسە ارەكەتسىزدىگى وسى قايعىلى وقيعاعا اكەپ سوققان بارلىق لاۋازىمدى تۇلعالار زاڭنىڭ بارلىق قاتاڭدىعىمەن جازالانادى. مەملەكەت قازا تاپقانداردىڭ وتباسىلارىن بۇل قايعىمەن جالعىز قالدىرمايدى. قازا تاپقان ءاربىر اسكەري قىزمەتشىنىڭ وتباسىنا ءىرى كولەمدە ماتەريالدىق كومەك كورسەتىلىپ، قاجەتتى قولداۋدىڭ بارلىعى بەرىلەدى»، — دەپ قوستى بوزىمبايەۆ.
پرەمەر-مينيستردىڭ ورىنباسارى تەرگەۋ بارىسى مەن وتباسىلارعا كومەك كورسەتۋ ءوزىنىڭ جەكە باقىلاۋىندا ەكەنىن دە اتاپ ءوتتى.
ەسكە سالايىق، 24 قىركۇيەكتە ماڭعىستاۋ وبلىسىندا قازاقستان رەسپۋبليكاسى قارۋلى كۇشتەرىنىڭ اسكەري-تەڭىز كۇشتەرىنىڭ وقۋ-جاتتىعۋى كەزىندە كاسپي تەڭىزىنىڭ جاعالاۋىندا اۋا رايىنىڭ كۇرت ناشارلاۋى مەن جەلدىڭ كۇشەيۋى سالدارىنان اسكەري قىزمەتشىلەر تەڭىزگە اعىزىلىپ كەتتى.
العاشىندا تەڭىزگە 19 اسكەري قىزمەتشى اعىزىلىپ كەتكەنى جانە 9 اسكەري قىزمەتشىنىڭ قازا تاپقانى بىردەن راستالعانى حابارلاندى. باس پروكۋراتۋرا اقتاۋ گارنيزونىندا قىلمىستىق ءىس قوزعالىپ، تەرگەلىپ جاتقانىن مالىمدەدى.
اسكەري قىزمەتشىلەردىڭ قازا تابۋىنان كەيىن ۇكىمەتتىك كوميسسيا قۇرىلىپ، توتەنشە وقيعا ورنىنا پرەمەر-مينيستردىڭ ورىنباسارى قانات بوزىمبايەۆ جىبەرىلدى. پرەزيدەنت قاسىم-جومارت توقايەۆ ماڭعىستاۋ وبلىسىندا اسكەري قىزمەتشىلەردىڭ قازا تابۋىنا بايلانىستى كوڭىل ايتىپ، قايعىلى وقيعانى تەرگەۋ جونىندە تاپسىرمالار بەردى.
اقتاۋدا قالا كۇنىنە وراي مەرەكەلىك ءىس-شارالار توقتاتىلدى. قاسىم-جومارت توقايەۆ 25 قىركۇيەكتى قازاقستاندا جالپىۇلتتىق ازا تۇتۋ كۇنى دەپ جاريالادى.
24 قىركۇيەك كەشىندە پرەمەر-مينيستردىڭ ورىنباسارى قانات بوزىمباەۆتىڭ باسشىلىعىمەن كوميسسيا ماڭعىستاۋ وبلىسىنا كەلدى. كاسپي تەڭىزىندەگى وقۋ-جاتتىعۋ كەزىندە قازا تاپقانداردىڭ تۋىستارى اقتاۋداعى ءمايىتحاناعا دەنەلەردى تانۋ ءۇشىن كەلدى.
24 قىركۇيەك كەشىندە ناقتىلانعان دەرەكتەر بەلگىلى بولدى: تەڭىزگە 17 ادام اعىزىلىپ كەتتى، ولاردىڭ 12ء-سى قازا تاپتى، ۇشەۋىن امان الىپ قالۋ مۇمكىن بولدى. قالعان ەكى اسكەري قىزمەتشىنى ىزدەۋ جالعاسۋدا.
سونداي-اق قورعانىس مينيسترلىگى كاسپي تەڭىزىندەگى وقۋ-جاتتىعۋ كەزىندە قازا تاپقان اسكەريلەردىڭ ءتىزىمىن جاريالادى. تىزىمگە 11 ماتروس جانە ءبىر اعا لەيتەنانت ەندى.