باتىس قازاقستان وبلىسىنىڭ ءبورلى اۋدانىندا پروكۋراتۋرانىڭ ارالاسۋىمەن 16-17 جاستاعى 1155 كامەلەتكە تولماعان بالانىڭ قۇقىعى قالپىنا كەلتىرىلدى. ەندى ولار قوعامدىق كولىكتە جول جۇرۋگە 50 پايىز جەڭىلدىك الادى، دەپ حابارلايدى infohub.kz سايتى.
بۇزۋشىلىق اۋداندىق ءماسليحاتتىڭ تاكسيدەن باسقا، قالاىشىلىك قوعامدىق كولىكتە جەكەلەگەن ساناتتاعى جولاۋشىلارعا جەڭىلدىكتى جول ءجۇرۋ تۋرالى شەشىمىن تالداۋ بارىسىندا انىقتالدى. قۇجاتتا 16-17 جاستاعى كامەلەتكە تولماعاندارعا جەڭىلدىك قاراستىرىلماعان، سوندىقتان وسى جاس توبىنداعى وقۋشىلار جول ءجۇرۋدىڭ تولىق قۇنىن تولەۋگە ءماجبۇر بولدى.
پروكۋراتۋرانىڭ اكتىسى بويىنشا ءماسليحات شەشىمىنە وزگەرىستەر ەنگىزىلدى. ەندى اقساي قالاسىندا كامەلەتكە تولماعان جولاۋشى ءۇشىن جول ءجۇرۋ قۇنى 50 تەڭگەنى قۇرايدى.
اۋداننىڭ باسقا دا باعىتتارىندا جەڭىلدىكتى تاريف بەلگىلەندى: كامەلەتكە تولماعاندار ءۇشىن جول ءجۇرۋ قۇنى 50%-عا تومەندەتىلدى.
پروكۋراتۋرادا كامەلەتكە تولماعانداردىڭ قۇقىقتارى مەن زاڭدى مۇددەلەرىن قورعاۋ جانە زاڭناما تالاپتارىنىڭ ساقتالۋىن قامتاماسىز ەتۋ جۇمىستارى جالعاسىپ جاتقانىن اتاپ ءوتتى.
بۇعان دەيىن «كۋرسيۆ» استانادا كۇندىزگى وقۋ نىسانىنداعى بالالارعا، سونىڭ ىشىندە جەكەمەنشىك مەكتەپ وقۋشىلارىنا تەگىن جول ءجۇرۋ قۇقىعىن كەڭەيتۋ ماقۇلدانعانىن جازعان. سونداي-اق وزگەرىستەر از قامتىلعان وتباسىلاردىڭ بالالارى ءۇشىن جەڭىلدىكتىڭ جىل بويى، ونىڭ ىشىندە كانيكۋل كەزىندە دە ارەكەت ەتۋىن قاراستىرعان.