باتىس قازاقستان وبلىسىندا جۇبايىنىڭ جۇيەلى تۇردە ىشىمدىك ءىشۋى مەن اگرەسسيۆتى مىنەز-قۇلقىنا بايلانىستى وتباسى ىدىرادى. بۇل تۋرالى infohub.kz سايتى حابارلايدى.
وبلىستىق سوتتاردىڭ Telegram-ارناسىندا ءمالىم بولعانداي، تالاپ قويۋشى ايەل سوتقا نەكەنى بۇزۋ تۋرالى ارىزدانعان. ول ءوز تالابىن جاۋاپكەردىڭ ۇنەمى ىشىمدىك ءىشىپ، اگرەسسيۆتى مىنەز كورسەتۋى ءجيى جانجال مەن ۇرىس-كەرىسكە اكەلىپ سوعاتىنىن العا تارتىپ نەگىزدەگەن. تالاپ قويۋشىنىڭ پىكىرىنشە، مۇنداي جاعداي كامەلەتكە تولماعان بالالاردىڭ پسيحولوگيالىق جانە فيزيكالىق دامۋىنا كەرى اسەر ەتۋى مۇمكىن.
جۇبايلار 2019 جىلدان بەرى نەكەدە تۇرعان. وتباسىندا التى، ءۇش جانە ءبىر جاسار ءۇش بالا تاربيەلەنۋدە.
سوت وتىرىسىندا جاۋاپكەر ىشىمدىك ىشەتىنىن مويىنداپ، وتباسىن ساقتاپ قالعىسى كەلەتىنىن ايتىپ، تاتۋلاسۋ ءۇشىن قوسىمشا ۋاقىت سۇرادى. الايدا سوت بەلگىلەگەن مەرزىمدە تاراپتار تاتۋلاسپادى.
سوت 2026 جىلعى 23 مامىردان باستاپ جۇبايلار بىرگە تۇرمايتىنىن، ورتاق شارۋاشىلىق جۇرگىزبەيتىنىن، وتباسىلىق قاتىناستار توقتاعانىن انىقتادى. تالاپ قويۋشى نەكەنى بۇزۋدى تالاپ ەتتى.
قازاقستان رەسپۋبليكاسى جوعارعى سوتىنىڭ نورماتيۆتىك قاۋلىسىنا سايكەس، ەگەر سوت بەرگەن مەرزىم وتكەن سوڭ جۇبايلار تاتۋلاسپاسا جانە ولاردىڭ كەمىندە بىرەۋى نەكەنى توقتاتۋدى تالاپ ەتسە، سوت نەكەنى بۇزادى.
كامەلەتكە تولماعان بالالاردىڭ مۇددەسىن ەسكەرە وتىرىپ، سوت ولاردىڭ تۇرعىلىقتى جەرىن اناسىمەن بىرگە انىقتادى. سونىمەن قاتار سوت بولەك تۇراتىن اتا-انانىڭ بالالارمەن قارىم-قاتىناس جاساۋعا قۇقىلى ەكەنىن جانە ولاردى تاربيەلەۋگە قاتىسۋعا مىندەتتى ەكەنىن ءتۇسىندىردى.
قازاقستان رەسپۋبليكاسىنىڭ «نەكە (ەرلى-زايىپتىلىق) جانە وتباسى تۋرالى» كودەكسىنە سايكەس اتا-انا ءوزىنىڭ كامەلەتكە تولماعان بالالارىن اسىراۋعا مىندەتتى. ءۇش جانە ودان دا كوپ بالاعا اليمەنت اتا-انانىڭ جالاقىسىنىڭ جانە (نەمەسە) وزگە دە تابىسىنىڭ جارتىسى مولشەرىندە وندىرىلەدى.
وسىعان بايلانىستى سوت جاۋاپكەردەن تالاپ قويۋشىنىڭ پايداسىنا ءۇش كامەلەتكە تولماعان بالانى اسىراۋعا اليمەنت ءوندىردى. اليمەنت ءوندىرۋ تۋرالى شەشىم دەرەۋ ورىندالۋعا جاتادى.
جۇبايلار ورتاق م ۇلىكتى ءبولۋ تۋرالى تالاپ قويماعان. سوت شەشىمى زاڭدى كۇشىنە ەنگەن جوق.