كونگو دەموكراتيالىق رەسپۋبليكاسىنىڭ شىعىسىنداعى كەيبىر اۋدانداردا ەبولا ىندەتى بويىنشا جاعداي جاقسارا باستادى، الايدا باسقا جەرلەردە اۋرۋ جۇقتىرۋشىلار سانى ءوسىپ كەلەدى. بۇل تۋرالى بىرىككەن ۇلتتار ۇيىمى حابارلادى، دەپ جازادى Reuters اگەنتتىگى، infohub.kz سايتىنا سىلتەمە جاساپ.
الايدا دۇنيەجۇزىلىك دەنساۋلىق ساقتاۋ ۇيىمى ىندەت شىڭىنان ءوتتى دەپ مالىمدەۋگە ءالى دايىن ەمەس. ددۇ-نىڭ دەنساۋلىق ساقتاۋ سالاسىنداعى توتەنشە جاعدايلار باعدارلاماسىنىڭ ەپيدەميولوگيا جانە تالداۋ ءبولىمىنىڭ جەتەكشىسى وليۆە لە پولەن مۇنداي قورىتىندى جاساۋعا ءالى ەرتە ەكەنىن اتاپ ءوتتى.
«بۇل ءورشۋدى تولىق باقىلاۋعا الۋ ءۇشىن بىرنەشە اي قاجەت بولادى، ول ءۇشىن ايتارلىقتاي قولداۋ كەرەك»، — دەدى ول.
كونگونىڭ دەنساۋلىق ساقتاۋ ءمينيسترى ساميۋەل روجە كامبا بۇعان دەيىن جاقسارۋدىڭ العاشقى بەلگىلەرى تۋرالى حابارلاعان. ونىڭ ايتۋىنشا، تامىز ايىنىڭ ورتاسىنداعى ىندەت شىڭىنان كەيىن ينفەكسيانىڭ تارالۋى بىرتىندەپ باياۋلاپ كەلەدى.
تاۋلىگىنە تىركەلەتىن جاڭا جاعدايلار سانى شىڭ كەزىندەگى شامامەن 120-دان 80-گە دەيىن ازايدى. سونىمەن قاتار، ىندەت جايلاعان 62 مەديسينالىق ايماقتىڭ 10-ىندا جاڭا جاعدايلار 22 كۇننەن استام تىركەلمەگەن.
كامبا بۇل كورسەتكىشتەردى وڭ سيگنال دەپ اتادى، ءبىراق ينفەكسيانىڭ تارالۋىنا قارسى شارالاردى السىرەتۋگە بولمايتىنىن اتاپ ءوتتى.
اعىمداعى ءورشۋدىڭ العاشقى جاعدايلارى تىركەلگەن يتۋري پروۆينسياسىندا دا جاعداي ايتارلىقتاي جاقساردى. كونگونىڭ ۇلتتىق بيومەديسينالىق زەرتتەۋلەر ينستيتۋتىنىڭ ديرەكتورى جان-جاك مۋيەمبە كەيبىر اۋدانداردا كورسەتكىشتەر « قىزىل» ايماقتان «جاسىل» ايماققا اۋىسقانىن مالىمدەدى.
ەڭ الاڭداتارلىق جاعداي سولتۇستىك كيۆۋ پروۆينسياسىندا قالىپتاسىپ وتىر. بۇۇ دەرەكتەرى بويىنشا، وندا جاعدايلار سانى تەز ءوسىپ كەلەدى، اسىرەسە بۋتەمبو قالاسىندا.
12 قىركۇيەكتە پروۆينسيادا 1 269 راستالعان جاعداي تىركەلدى، ونىڭ 555ء-ى سوڭعى 21 كۇندە.
ايماقتا ينفەكسيانىڭ تارالۋىن تەجەۋ قاۋىپسىزدىك جاعدايىنىڭ كۇردەلىلىگىنە، حالىقتىڭ تىعىزدىعىنىڭ جوعارىلىعىنا جانە ادامداردىڭ بەلسەندى قوزعالىسىنا بايلانىستى قيىنعا سوعىپ وتىر.
بارلىعى، كونگو ۇكىمەتىنىڭ 15 قىركۇيەكتە جاريالاعان دەرەكتەرى بويىنشا، جەتى پروۆينسيادا ەبولانىڭ 7258 راستالعان جاعدايى جانە 3510 ءولىم تىركەلگەن.
اعىمداعى ءورشۋ ءولىم سانى بويىنشا تاريحتاعى ەكىنشى ورىندا تۇر، ودان تەك 2014-2016 جىلدارى جالعاسقان باتىس افريكاداعى ىندەت قانا اسىپ تۇسەدى.
ددۇ وكىلدەرى جاعداي جاقسارعاننان كەيىن دە ىندەت قايتا كۇشەيۋى مۇمكىن ەكەنىن ەسكە سالدى. سوندىقتان ماماندار بەلسەندى شارالاردى جالعاستىرۋعا شاقىرادى.
بۇعان دەيىن Kursiv Health استانا حالىقارالىق اۋەجايىندا ەبولا سياقتى اسا ءقاۋىپتى ينفەكسيالاردىڭ اكەلىنۋىنە قارسى وقۋ-جاتتىعۋ وتكەنىن جازعان بولاتىن.