فرانسۋز سۋرەتشىسى انري ءماتيستىڭ سان-پاۋلۋ كىتاپحاناسىنان ۇرلانعان سەگىز يلليۋستراسياسىن برازيليا پوليسياسى تاپتى. بۇل تۋرالى infohub.kz حابارلادى.
قۇنى شامامەن 200 مىڭ دوللار (148 مىڭ فۋنت ستەرلينگ) باعالاناتىن تۋىندىلار بەيسەنبى كۇنى قالانىڭ وڭتۇستىگىندەگى سان-بەرناردۋ-دۋ-كامپۋ قالاشىعىنداعى ۇيدەن تابىلدى. وقيعا ورنىندا 44 جاستاعى ەر ادام كۇدىكتى رەتىندە ۇستالدى.
وتكەن جىلدىڭ 7 جەلتوقسانىندا ماريۋ دي اندرادي كىتاپحاناسىندا بولعان توناۋ كەزىندە ەكى ۇرى كۇزەتشى مەن كىتاپحاناعا كەلگەن ەگدە جاستاعى جۇپتى باسىپ-جانشىپ، تۋىندىلاردى باستى كىرەبەرىس ارقىلى جاياۋ الىپ كەتكەن.
بۇعان دەيىن ىسكە بايلانىستى تاعى ءۇش ادام ۇستالعان بولاتىن. توناۋ كەزىندە قولعا تۇسكەن برازيليالىق سۋرەتشى كانديدۋ پورتينارۋدىڭ بەس تۋىندىسى ءالى تابىلعان جوق.
بەيسەنبى كۇنى ۇستالعان جۋان پاۋلۋ ليمارەس دە اراۋجۋ پوليسيانىڭ بولجامىنشا، تۋىندىلاردى ۇرلىققا قاتىسى بار دەپ ايىپتالعانداردىڭ تاپسىرماسى بويىنشا ساقتاعان. بۇل تۋرالى برازيليالىق Globo باسىلىمى حابارلادى.
برازيليا باق-ىنىڭ مالىمەتىنشە، 53 جاستاعى لاەسيو رودريگەس دە وليۆەيرا — بەلگىلى ونەر ۇرىسى، ول قىلمىستى جوسپارلاپ، باسقارعان دەپ كۇدىكتەلەدى. ول ءساۋىر ايىنان بەرى باسقا ءىس بويىنشا قاماۋدا وتىر.
كىتاپحاناداعى توناۋعا بايلانىستى تاعى ءبىر ەر ادام مەن ءبىر ايەل ۇستالعان.
ءماتيستىڭ Jazz اتتى شەكتەۋلى تيراجبەن شىققان كىتاپقا ارنالعان يلليۋستراسيالارى مەن پورتينارۋدىڭ برازيليالىق جازۋشى جوزە لينس دۋ رەگۋنىڭ «Menino de Engenho» (پلانتاسيا بالاسى) رومانىنىڭ ارنايى باسىلىمىنا جاساعان بەس گراۆيۋراسى سان-پاۋلۋ زاماناۋي ونەر مۇراجايىمەن بىرلەسكەن كورمەنىڭ بولىگى بولعان.
ۇرىلار «كىتاپتان مۇراجايعا» دەپ اتالاتىن كورمەنىڭ سوڭعى كۇنىن نىساناعا العان. ولار كىتاپحاناعا تاڭعى ساعات 11 شاماسىندا باستى كىرەبەرىستەن كىرىپ، توناۋدان كەيىن ەڭ جاقىن مەترو بەكەتىنە بەت العان.
جەرگىلىكتى مادەنيەت دەپارتامەنتى يلليۋستراسيالار كىتاپحاناعا قايتارىلعانىن، ال كىتاپحانانىڭ قاۋىپسىزدىگى كۇشەيتىلگەنىن حابارلادى.
ماتيس 20 عاسىردىڭ ەڭ ىقپالدى سۋرەتشىلەرىنىڭ ءبىرى سانالادى، ال ونەر سىنشىلارى ۇرلانعان تۋىندىلاردىڭ قۇنىن «باعا جەتپەس» دەپ باعالايدى.
كوبىنەسە اۋىل ەڭبەككەرلەرى مەن جۇمىسشىلاردى بەينەلەيتىن پورتينارۋ — برازيليالىق مودەرنيزمنىڭ ەڭ ماڭىزدى وكىلدەرىنىڭ ءبىرى.