برازيليانىڭ وڭتۇستىگىندە جولاۋشىلار اۆتوبۋسى مەن جۇك كولىگىنىڭ بەتپە-بەت سوقتىعىسۋى سالدارىنان كەمىندە 21 ادام قازا تاۋىپ، تاعى تورتەۋى جاراقات الدى. بۇل تۋرالى جەرگىلىكتى بيلىك وكىلدەرى حابارلادى.
وقيعا جەرگىلىكتى ۋاقىت بويىنشا تاڭعى 04:30 شاماسىندا (گرينۆيچ بويىنشا 07:30) پارانا شتاتىنىڭ وڭتۇستىگىندەگى BR-373 تاس جولىندا بولعان. جەرگىلىكتى ب ا ق دەرەكتەرىنە سۇيەنسەك، اۆتوبۋس جاقىن ماڭداعى يمبيتۋۆا قالاسىنىڭ دەنساۋلىق ساقتاۋ ورگاندارىنا تيەسىلى بولىپ، پونتا-گروسسا قالاسىنا (شامامەن 60 شاقىرىم جەردە) ەمدەلۋگە بارا جاتقان ناۋقاستار مەن ولاردىڭ تۋىستارىن تاسىمالداعان.
ەكى كولىكتىڭ سوقتىعىسۋ سەبەبىن انىقتاۋ ءۇشىن تەرگەۋ باستالدى. تاس جولدىڭ 209-شاقىرىمىندا بولعان وقيعا ورنىن ساراپشىلار مەن فەدەرالدى جول پوليسياسى قىزمەتكەرلەرى تەكسەرىپ جاتقاندىقتان، تاس جول ۋاقىتشا جابىلدى.
برازيليادا جول-كولىك وقيعالارىنان بولاتىن ءولىم سيرەك ەمەس. دۇنيەجۇزىلىك بانكتىڭ زەرتتەۋىنە سايكەس، 2023 جىلى مۇنداي اپاتتاردان 34 مىڭنان استام ادام قازا تاپقان، ولاردىڭ كوپشىلىگى موتوسيكل جۇرگىزۋشىلەرى. زەرتتەۋلەر كورسەتكەندەي، شامادان تىس جىلدامدىق، ماس كۇيىندە جۇرگىزۋ جانە كولىك جۇرگىزۋ كەزىندە ۇيالى تەلەفوندى پايدالانۋ ءجيى سەبەپ بولادى.
اقپان ايىندا ەلدىڭ سولتۇستىك-شىعىسىنداعى سەارا شتاتىندا فەستيۆالعا بارا جاتقان قاجىلار مىنگەن اۆتوبۋستا 15 ادام قازا تاپقان ەدى.