ۇلىبريتانيانىڭ ارنايى اۋە قىزمەتىنىڭ (SAS) بۇرىنعى مۇشەسىنىڭ تەرروريزمگە قارسى وپەراسياعا قاتىسۋى تۋرالى كىتابىن جاريالاۋعا سالىنعان تىيىم قورعانىس مينيسترلىگىنىڭ ءوتىنىشى بويىنشا ۇزارتىلدى. كىتاپتىڭ ەل اۋماعىندا جارىق كورۋىنە قويىلعان شەكتەۋ اسكەري قىزمەتكەرگە قارسى ۇكىمەتتىڭ سوت ءىسى اياقتالعانشا جالعاسادى. ول تەك كريستيان كرەيگحەد دەگەن بۇركەنشىك اتپەن بەلگىلى، دەپ حابارلايدى infohub.kz سايتى.
كرەيگحەد 2019 جىلى كەنيا استاناسى نايروبيدە ءال-شاباب توبىنىڭ شابۋىلىنان كەيىن بولعان وقيعاعا قاتىسقانى ءۇشىن ۆيكتوريا كرەستىنەن ءبىر ساتى تومەن ماراپات — «كورنەكتى ەرلىك كرەستىن» العان. سول شابۋىلدا 21 ادام قازا تاپتى. كرەيگحەد قارۋلى سودىرلار ءقوناقۇي كەشەنىنە شابۋىل جاساعاندا 700-دەن استام ادامدى قۇتقارعانىن مالىمدەيدى.
قورعانىس مينيسترلىگى كرەيگحەدتىڭ كىتابىندا ول بريتاندىق ارنايى كۇشتەرگە قوسىلعان كەزدە ءوز ەركىمەن قول قويعان قۇپيالىلىق كەلىسىمىنىڭ بۇزىلعانى بار دەپ ەسەپتەيدى. وسى ايدا ۋاقىتشا تىيىم سالىنعان بولاتىن، ال بەيسەنبىدە ۇكىمەت ادۆوكاتتارى سوت ءىسى شەشىلگەنشە ونى ۇزارتۋدى سۇراپ، جوعارعى سوتقا قايتا كەلدى.
قورعانىس مينيسترلىگىنىڭ اتىنان سويلەگەن وليۆەر ساندەرس KC لوندونداعى سوتقا كرەيگحەدتىڭ كەلىسىمدى بۇزعانى تۋرالى تالاپ «انىق ءارى داۋ تۋدىرمايتىنىن» ايتتى. كىتاپ اقش-تا جارىق كورگەن، ءبىراق ساندەرستىڭ پايىمداۋىنشا، بۇل ماڭىزدى ەمەس، ويتكەنى «ونىڭ شەتەلدە قولجەتىمدى بولۋىنىڭ جالعىز سەبەبى — جاۋاپكەردىڭ ءوزىنىڭ قۇقىققا قايشى ارەكەتى».
كرەيگحەد سوتقا كەلمەدى، ونىڭ وكىلى دە بولمادى. تىيىمدى ۇزارتۋ تۋرالى شەشىمدە سۋديا سايني مىرزا كرەيگحەدتىڭ كەلىسىمشارتقا «ءوز ەركىمەن كىرىسكەنىن» جانە وعان باسشىلارى كىتاپتى جاريالاۋعا رۇقسات بەرىلمەيتىنىن «انىق ءارى دايەكتى تۇردە ايتقانىن» مالىمدەدى.
سۋديا قورعانىس مينيسترلىگىنىڭ «تىيىم سالۋعا تولىق نەگىزى بار» دەپ سانايتىنىن جانە كرەيگحەد كەلىسىمدى «اشىق تۇردە بۇزعان» سياقتى كورىنەتىنىن، ونى «ىقتيمال سالدارعا كوزىن اشىق ۇستاپ» جاساعانىن ايتتى.
كرەيگحەد 2023 جىلى قورعانىس مينيسترلىگىنە قارسى سوت تالابىنان ۇتىلىپ قالعان ەدى. وندا ۆەدومستۆو ۇلتتىق قاۋىپسىزدىك مۇددەسىن نەگىزگە الىپ، كىتاپتىڭ جاريالانۋىنا رۇقسات بەرمەگەن بولاتىن.
كرەيگحەد 1992 جىلى قارۋلى كۇشتەر قاتارىنا قوسىلىپ، 2006–2020 جىلدارى ارنايى كۇشتەردە قىزمەت ەتتى. سوتقا بۇرىن ارنايى كۇشتەرگە قوسىلعان كەزدە ول SAS-تاعى قىزمەتى تۋرالى اقپاراتتى جاريالاۋعا تىيىم سالاتىن كەلىسىمگە قول قويعانى ايتىلعان.
قۇپيالىلىق كەلىسىمىندە كرەيگحەد ارنايى كۇشتەردەگى قىزمەتىنە قاتىستى اقپاراتتى قورعانىس مينيسترلىگىنىڭ «جازباشا الدىن الا رۇقساتىنسىز» جاريالاماۋعا «ءومىرىمنىڭ سوڭىنا دەيىن مىندەتتەيتىن سالتاناتتى ۋادە» بەرەتىنى جازىلعان. كىتاپقا قاتىستى مۇنداي رۇقسات بەرىلمەگەن.
ساندەرس: «ەگەر ول كەلىسىمگە قول قويماعاندا، ۇلىبريتانيانىڭ ارنايى كۇشتەرىندە قىزمەت ەتپەس ەدى. نايروبيدە دە بولماس ەدى؛ وعان دايىندىق، جابدىق، قارۋ-جاراق، قولداۋ دا بەرىلمەس ەدى. وعان بۇل ۇناماسا دا، ول وسىعان كەلىسكەن، ال كەلىسىمشارت قۇقىعى تۇرعىسىنان بۇل وتە، وتە انىق»، — دەدى.