ۇلىبريتانيادا الاياقتار ادامداردىڭ ەلەكتروندىق پوشتاسى مەن الەۋمەتتىك جەلىدەگى اككاۋنتتارىن بۇزىپ، ولاردىڭ اتىنان سويلەپ، ءبىر جىلدا ۇرلاعان اقشانىڭ جالپى كولەمى 400%-دان استام وسكەن. بۇل تۋرالى ەلدىڭ رەسمي دەرەكتەرى كورسەتىپ وتىر، دەپ حابارلايدى infohub.kz سايتى.
كوپ جاعدايدا الاياقتار بىرەۋدىڭ اككاۋنتىن بۇزىپ الىپ، ونىڭ اتىن پايدالانىپ، ساتىلىپ كەتكەن كونسەرتتەرگە جالعان بيلەتتەردى سول ادامنىڭ سەنىمدى دوستارى مەن تۋىستارىنا ساتۋعا تىرىسادى.
لوندون پوليسياسى جۇرگىزەتىن، ەلدەگى ەكونوميكالىق قىلمىسقا جاۋاپتى «Report Fraud» قىزمەتىنىڭ مالىمەتىنشە، ەلەكتروندىق پوشتا مەن الەۋمەتتىك جەلى اككاۋنتتارىن بۇزۋ ارقىلى ۇرلانعان اقشانىڭ جالپى سوماسى 2025–26 قارجى جىلىندا 6،3 ميلليون فۋنت ستەرلينگكە جەتكەن. ال 2024–25 جىلى بۇل كورسەتكىش 1،2 ميلليون فۋنت ەدى.
الايدا ناقتى سوما الدەقايدا جوعارى بولۋى مۇمكىن، ويتكەنى كوپتەگەن قۇربان قىلمىس تۋرالى ارىز بەرمەيدى. ولار كوبىنە ۇيالعاندىقتان، كەيدە ۇرلانعان اقشانىڭ مولشەرى سالىستىرمالى تۇردە از بولعاندىقتان شاعىمدانبايدى.
بۇعان دەيىن The Guardian باسىلىمى مۋزىكا اۋەسقويىنىڭ وقيعاسىن جاريالاعان ەدى. ونىڭ Instagram اككاۋنتىن بۇزعان حاكەرلەر ونىڭ اتىنان Oasis توبىنىڭ كونسەرتىنە بيلەت جارنامالاپ، دوستارىنان 1400 فۋنت ستەرلينگ ۇرلاعان. ول حاكەرلەر ءوزىن سونشالىقتى شەبەر قىلىپ كورسەتكەنىن، ءتىپتى دوستارى مەن تۋىستارى شىنىمەن وزىمەن سويلەسىپ وتىر دەپ ويلاعانىن ايتقان.
باسقالارى WhatsApp پەن SMS ارقىلى كەلگەن جالعان حابارلامالارعا الدانىپ قالعان. مۇنداي حابارلامالاردا قىلمىسكەر ءوزىن ادامنىڭ بالاسى نەمەسە تۋىسى رەتىندە تانىستىرىپ، شۇعىل اقشا سۇرايدى. بۇل الاياقتىق «Hi mum» دەپ اتالعان.
Santander بانكىنىڭ دەرەكتەرى بويىنشا، بانك كليەنتتەرىنىڭ اراسىندا ءوزىن بىرەۋدىڭ ۇلى رەتىندە تانىستىرعان الاياقتار اقشانى ەڭ كوپ جىمقىرعان، ودان كەيىن قىزدارى رەتىندە ارەكەت ەتكەندەر تۇر.
«Report Fraud» قىزمەتىنىڭ وپەراسيالىق جەتەكشىسى، اعا كوميسسار اماندا ۆۋلف: «كوپ ادام ءۇشىن اككاۋنتتىڭ بۇزىلۋى — جاي عانا كيبەرماسەلە ەمەس، بۇل جەكە باسقا قاتىستى جاعداي. بۇل قۇربانداردى ماڭىزدى اككاۋنتتارىنان ايىرىپ، قانداي اقپاراتقا قول جەتكىزىلگەنىنە الاڭداتىپ، قىلمىسكەرلەر ولاردىڭ اتىن پايدالانىپ باسقالارعا شابۋىل جاساۋى مۇمكىن دەگەن ءقاۋىپ تۋدىرادى»، — دەدى.
ول سونداي-اق ءبىر بۇزىلعان اككاۋنتتان باستالعان جاعداي «الاياقتار سەنىمدى قارىم-قاتىناستاردى پايدالانىپ، ودان ءارى الاياقتىق جاساي وتىرىپ، وتباسىنا، دوستارىنا جانە ارىپتەستەرىنە تەز تارالۋى مۇمكىن» ەكەنىن قوستى.
«Report Fraud» قىزمەتى جۇرتشىلىقتى ونلاين اككاۋنتتارىن حاكەرلەردەن قورعاۋعا شاقىراتىن اقپاراتتىق ناۋقان باستاپ وتىر. وندا مۇمكىندىك بولسا، passkey (بيومەتريالىق كىلت) جۇيەسىنە كوشۋ ۇسىنىلادى. Passkey ادامنىڭ قۇرىلعىسى مەن بيومەتريالىق دەرەكتەرىن پايدالانىپ، ونى راستايدى جانە ءقۇپياسوز سياقتى بۇزىلۋعا كونبەيدى.