ۇلىبريتانياداعى رەدينگ ۋنيۆەرسيتەتىنىڭ عالىمدارى بەركشيردە وسىرىلگەن كاكاو بۇرشاقتارىنان شوكولاد جاسادى. بۇل ەل تاريحىنداعى ەكىنشى تولىق بريتاندىق شوكولاد. العاشقىسى 1932 جىلى Rowntree's كونديتەرلىك فابريكاسىندا جاسالىپ، ونى سول كەزدە التى جاسار بولاشاق پاتشايىم II ەليزاۆەتا جەگەن بولاتىن. بۇل تۋرالى infohub.kz حابارلادى.
جاڭا شوكولاد ۋنيۆەرسيتەتتىڭ 100 جىلدىعىنا وراي جاسالدى. ول ينستيتۋت كوللەكسياسىنداعى وسىمدىكتەردىڭ كاكاوسىنان دايىندالدى. جوبانى ۋنيۆەرسيتەتتىڭ ماگيسترانتى ماحا حان باسقاردى. ول بۇرشاقتاردى ۋنيۆەرسيتەتتىڭ تاماقتانۋ فاكۋلتەتىندە جيناپ، اشىتىپ، وڭدەدى.
حاننىڭ ايتۋىنشا، بۇل شوكولاد ازىق-ت ۇلىك قاۋىپسىزدىگىنىڭ وسالدىعىن كورسەتەدى. كاكاو وسىمدىكتەرى تەمپەراتۋرا مەن جاۋىن-شاشىننىڭ وزگەرۋىنە وتە سەزىمتال، ال كليماتتىڭ وزگەرۋى الەمدەگى كاكاونىڭ نەگىزگى بولىگىن وندىرەتىن ەلدەردە ءقازىردىڭ وزىندە پروبلەمالار تۋعىزۋدا. سوندىقتان ءارتۇرلى سورتتاردى ساقتاۋ فەرمەرلەرگە وزگەرمەلى كليماتقا توتەپ بەرە الاتىن ءتوزىمدى وسىمدىكتەر وسىرۋگە كومەكتەسۋ ءۇشىن وتە ماڭىزدى.
حان شوكولادتىڭ ءدامى تاماشا جانە وتە باي ەكەنىن ايتتى. ول سونداي-اق وڭدەلمەگەن شيكى كاكاونىڭ ءدامىن تاتتى: «بۇرشاقتار ءليچيدىڭ دامىنە ۇقساس اق جۇمساق قابىقپەن قاپتالعان، بۇل ەلدەگى كوپ ادامعا تانىس ەمەس». ول شوكولادتىڭ 300-دەن استام سورتتىڭ كاكاوسىنان جاسالعانىن جانە دامدىك قاسيەتتەرىنىڭ كۇردەلىلىگى تاڭعالارلىق ەكەنىن اتاپ ءوتتى.
ۋنيۆەرسيتەت بۇل جوبا اۋا رايىنىڭ وزگەرۋىنە، زيانكەستەر مەن اۋرۋلارعا ءتوزىمدى بولۋى مۇمكىن كاكاو سورتتارىن ساقتاۋداعى جۇمىسىنىڭ ماڭىزدىلىعىن كورسەتەدى دەپ ۇمىتتەنەدى. رەدينگ ۋنيۆەرسيتەتىنىڭ حالىقارالىق كاكاو كارانتين ورتالىعىندا 300-دەن استام كاكاو وسىمدىگى بار جانە الەمدەگى كاكاو وسىمدىكتەرىنىڭ حالىقارالىق اينالىمىنىڭ 97% وسى ورتالىق ارقىلى وتەدى.
سوڭعى جىلدارى كاكاو وسىرەتىن ايماقتارداعى جوعارى تەمپەراتۋرا وسىمدىكتەردىڭ ءوسۋىن تەجەپ، شوكولاد باعاسىنىڭ وسۋىنە اكەلدى. كليماتتىڭ وزگەرۋىنەن تۋىنداعان قاتتى جاڭبىر افريكاداعى ەگىندەردى دە سۋعا باتىردى. قازىرگى ۋاقىتتا تەك التى پليتكا شوكولاد جاسالدى، ءبىراق حان بۇرشاقتاردىڭ قولجەتىمدىلىگىنە بايلانىستى ءوندىرىستى ۇلعايتۋدى ۇمىتتەنەدى. ول ءبىر پليتكانى ۋەلس حانشايىمىنا بەرۋدى جوسپارلاپ وتىر، ويتكەنى العاشقى بريتاندىق شوكولادتى 1932 جىلى بولاشاق پاتشايىم جەگەن، ال كەلەسى پليتكانى رەدينگتە تۋعان تاعى ءبىر بولاشاق پاتشايىمعا سىيعا تارتۋ ورىندى بولار ەدى.