بريتاندىقتاردى ماقتان ەتەتىن نارسە — شاي ءىشۋ، سىرا ءىشۋ نەمەسە اۋا-رايى تۋرالى اڭگىمەلەسۋ ەمەس. Public First زەرتتەۋ ورتالىعى جۇرگىزگەن اۋقىمدى ساۋالناماعا سايكەس، ەڭبەكقورلىق، ادىلدىك جانە قوعامداستىق — بۇل بريتاندىقتاردىڭ بارلىق جاستاعى، الەۋمەتتىك توپتاعى جانە ساياسي كوزقاراستاعى ازاماتتارىن بىرىكتىرەتىن باستى قۇندىلىقتار، دەپ حابارلايدى infohub.kz سايتى.
زەرتتەۋگە 6000 ەرەسەك ادام قاتىسىپ، 300 اداممەن فوكۋس-توپتار وتكىزىلدى. قاتىسۋشىلارعا ەڭ ماڭىزدى قۇندىلىقتاردى تاڭداۋ ۇسىنىلدى. ناتيجەسىندە، «ەڭبەكقورلىق» بريتاندىقتاردىڭ 70%-ى ءۇشىن باستى قاسيەت بولسا، «قوعامداستىق» تا ماڭىزدى — 80% ادامدار كورشىلەر بىر-بىرىنە قامقورلىق جاساعاندا بريتانيا ەڭ جاقسى كۇيىندە بولادى دەپ سانايدى. سونداي-اق، «ادىلدىك» پەن ءوز كەزەگىن كۇتۋ — ەڭ ايقىن ورتاق قۇندىلىقتار رەتىندە اتالدى.
دەگەنمەن، زەرتتەۋ بريتاندىقتاردىڭ بولاشاققا دەگەن پەسسيميزمىن دە انىقتادى: رەسپوندەنتتەردىڭ 65%-ى Brexit-تەن كەيىن ەل بۇرىنعىدان دا جىكتەلگەنىن سەزىنەدى. ءاربىر ءۇشىنشى ادام عانا ۇلىبريتانيانىڭ بولاشاعىنا ۇمىتپەن قارايدى، ال 70%-ى سوڭعى بەس جىلدا جاعداي ناشارلاعانىن ايتادى.
سونداي-اق، ساۋالناماعا قاتىسقانداردىڭ جارتىسى يمميگراسيانىڭ ەلگە كەرى اسەرىن تيگىزگەنىن ايتسا، تەك بەستەن ءبىرى عانا مادەني ارتۇرلىلىك ماقتانىش سەزىمىن تۋدىراتىنىن جەتكىزدى. بۇل — قوعامداعى تەرەڭ الشاقتىقتى كورسەتەدى.
British Future ديرەكتورى ساندەر كاتۆالانىڭ پىكىرىنشە، ساياساتكەرلەر ادامداردى بولەتىن ەمەس، بىرىكتىرەتىن قۇندىلىقتارعا جۇگىنۋى كەرەك. زەرتتەۋگە قارجىلاندىرعان Pears Foundation ءتوراعاسى ترەۆور پيرس ادامداردى بىرىكتىرەتىن باستامالاردى كوبەيتۋ قاجەتتىگىن اتاپ ءوتتى.