قازاقستاننىڭ دامۋ بانكى 2026 جىلى قىزىلوردا وبلىسىندا جالپى قۋاتى 70 مۆت كۇن ەلەكتر ستانسيالارى پاركىنىڭ قۇرىلىسىن قارجىلاندىرۋعا كىرىستى. جوبانى VIGOR Holding كومپانياسى جۇزەگە اسىرىپ وتىر. ونىڭ ەڭ ءىرى اكسيونەرى — قازاقستاندىق ميللياردەر ۆلاديمير كيمنىڭ قۇرىلىمدارىنا قاتىسى بار توپ-مەنەدجەر دينارا ۋلدانوۆا، دەپ حابارلايدى infohub.kz سايتى.
برك دەرەگىنشە، جوبا ماقۇلدانعان، قارجىلاندىرۋ 2026 جىلى باستالعان. جوبانىڭ قۇنى 148،9 ملن جۇڭگو يۋانىنە — شامامەن 9،46 ملرد تەڭگەگە باعالانىپ وتىر. وسى سومانىڭ 104،1 ملن ءيۋانىن (شامامەن 6،61 ملرد تەڭگە) نەمەسە مالىمدەلگەن قۇننىڭ 70%-ىن قازاقستاننىڭ دامۋ بانكى بەردى.
قاراجات 15 جىلعا دەيىنگى مەرزىمگە بولىنەدى. سىياقى مولشەرلەمەسى قالقىمالى — 5Y LPR (قىتايدىڭ بازالىق مولشەرلەمەسى) پليۋس 4،16 پايىزدىق تارماقتى قۇرايتىن تۇراقتى ۇستەمە.
ۋلدانوۆانىڭ ەسىمى «قازاقمىس» قۇرىلىمىنداعى كومپانيالاردىڭ كورپوراتيۆتىك قۇجاتتارىندا كەزدەسەدى. اتاپ ايتقاندا، ول Kazakhmys Copper مەن Bank RBKء-نىڭ 2025 جىلعى اففيلييرلەنگەن تۇلعالار تىزىمىندە بار.
ايتا كەتەيىك، 65 جاستاعى ميللياردەر ۆلاديمير كيمگە Kazakhmys Holding Limitedء-تىڭ 70%-ى تيەسىلى، قالعان 30%-ىن ەدۋارد وگاي باقىلايدى.
سونىمەن قاتار Adata دەرەگىنشە، ۋلدانوۆا وسى توپتىڭ ەنەرگەتيكالىق بيزنەسىنە KCC Power Provider باسشىسى رەتىندە قاتىسى بار. VIGOR Holdingء-تىڭ وزىندە وعان ەڭ ۇلكەن ۇلەس — 50% تيەسىلى. تاعى 25%-دان ايتۋعان جاقسىمباي مەن ءمولدىر جاقانوۆاعا تيەسىلى.
جاقسىمباي بۇرىن «قازىنا كاپيتال مەنەدجمەنتتە» باسشىلىق قىزمەت اتقارعان. اففيلييرلەنگەن تۇلعالار تۋرالى قۇجاتتاردا ول كومپانيا باسقارما ءتوراعاسىنىڭ ورىنباسارى جانە باسقارما مۇشەسى رەتىندە كورسەتىلگەن. ول سونداي-اق Baiterek Venture Fund باسقارما ءتوراعاسىنىڭ ورىنباسارى رەتىندە دە كورسەتىلگەن.
جاقانوۆا دا «بايتەرەك» توبىنىڭ ينۆەستيسيالىق قۇرىلىمىندا جۇمىس ىستەگەن. اففيلييرلەنگەن تۇلعالار تۋرالى قۇجاتتاردا ول Qazaqstan Investment Corporation باسقارما ءتوراعاسىنىڭ ورىنباسارى رەتىندە كورسەتىلگەن.
وسىلايشا، VIGOR Holdingء-تىڭ ءۇش تۇپكىلىكتى بەنەفيسيارىنىڭ ەكەۋى «بايتەرەك» توبىنىڭ ينۆەستيسيالىق قۇرىلىمدارىندا باسشىلىق قىزمەتتە بولعان.
VIGOR Holding كۇن ەنەرگەتيكاسىمەن اينالىسادى. 70 مۆت جوبادان بولەك، كومپانيا قىزىلوردا وبلىسىنداعى شيەلى كەنتىندە قۋاتى 20 مۆت كۇن ەلەكتر ستانسياسىن ىسكە اسىرعانىن حابارلاعان.
ۆلاديمير كيم — قازاقستاننىڭ ەڭ باي كاسىپكەرلەرىنىڭ ءبىرى، ونىڭ بايلىعى ەڭ الدىمەن تاۋ-كەن ونەركاسىبى مەن قارجى سالاسىنا بايلانىستى.
Forbes Kazakhstan-نىڭ جاڭا «قازاقستاننىڭ 75 ەڭ باي بيزنەسمەنى – 2026» رەيتينگى بويىنشا ونىڭ بايلىعى 5،9 ملرد دوللارعا باعالانىپ وتىر. ءبىر جىلدا ول 200 ملن دوللارعا وسكەن: 2025 جىلى باعا 5،7 ملرد دوللار بولعان. وسىنىڭ ارقاسىندا كيم قازاقستاننىڭ ەڭ باي بيزنەسمەندەرى اراسىندا ءۇشىنشى ورىننان ەكىنشى ورىنعا كوتەرىلدى. ءبىرىنشى ورىندى 7،8 ملرد دوللارمەن ۆياچەسلاۆ كيم يەلەنىپ وتىر.
Forbesء-تىڭ 2026 جىلعى الەمدىك ميللياردەرلەر تىزىمىندە ۆلاديمير كيم سول 5،9 ملرد دوللارمەن 712-ورىندا تۇر. ايتا كەتەيىك، كورسەتكىش ناقتى ۋاقىت رەجيمىندە وزگەرىپ وتىرادى: 9 قىركۇيەكتە Forbes ونىڭ كاپيتالىن تاعى دا 5،9 ملرد دوللار دەپ باعالاعان، ءبىراق الەمدە 705-ورىنعا قويعان.