Calvin Klein برەندىنىڭ كۇزگى جاڭا ناۋقانى ءالى باستالماي جاتىپ، BTS-تەگى چونگۋك الەمدى ءدۇر سىلكىندىردى. سۇيىكتى ارتىسپەن تۇسىرىلگەن قىسقا تيزەر الەۋمەتتىك جەلىلەردى جارىپ جىبەردى، دەپ حابارلايدى infohub.kz سايتى.
بەينەباياننىڭ باسىندا كورەرمەندەرگە ءارتىس ءجۇزى ەمەس، قولى مەن بىلەگىنە سالىنعان Army تاتۋيروۆكاسى كورسەتىلدى. بەرىلگەن جانكۇيەرلەر سۇيىكتى ورىنداۋشىنى ءبىر ساتتە تانىپ، ينتەرنەتتى ءتانتى پىكىرلەرگە تولتىردى.
«سىزدەردە الەمدەگى ەڭ ادەمى مودەل»، «JK»، «چونگۋك باسقا عالامدا مودەل بولدى ما؟ جىگىت ءبارىن ءمىنسىز اتقارادى»، — دەپ جازادى قولدانۋشىلار.
Billboard حابارلاۋىنشا، تيزەر بىرنەشە ساعاتتىڭ ىشىندە قىتايدىڭ گۋانچجوۋ قالاسىنداعى الىپ سىرتقى جارناما ەكراندارىندا پايدا بولىپ، جۇزدەگەن جۇرگىنشىنىڭ نازارىن اۋداردى.
Feel the Fit كۇزگى ناۋقانىنىڭ ءۇشىنشى بولىگى قوزعالىس، ىرعاق جانە كيىمنىڭ ءمىنسىز وتىرۋى يدەياسىنا قۇرىلعان.
بەينەبايان چونگۋكتىڭ Calvin Klein دجينسىسىن كيۋىنەن باستالادى، ال سىدىرمانىڭ دىبىسى بيتكە اينالادى. بوببي براۋننىڭ My Prerogative جانە Average White Band-تىڭ Cut the Cake ايگىلى ترەكتەرىنىڭ سۇيەمەلدەۋىمەن ءارتىس ءستيلدى بيلەيدى. جارنامالىق ماتەريالداردا جۇلدىز ماۋسىمنىڭ باستى ترەندتەرىن — 90-شى جىلدار ستيلىندەگى ءتۇرلى كوك رەڭكتەگى كلاسسيكالىق تىك دجينسىلار مەن كەڭ بالاقتى وۆەرسايز دجينسىلاردى كورسەتەدى.
مۋزىكانتتىڭ برەندپەن ىنتىماقتاستىعى الدەقاشان تانىمالدىق رەكوردتارىن جاڭارتىپ كەلەدى. بۇعان دەيىن ونىڭ جوبالارى ماركاعا ميلليونداعان دوللار مەديا-ەكسپوزيسيا اكەلىپ، ءتىپتى PVH حولدينگىنىڭ اكسيالارىنىڭ ۋاقىتشا وسۋىنە سەبەپ بولعان.
بۇعان دەيىن Kursiv LifeStyle BTS جانكۇيەرلەرىنىڭ ءبىرىنىڭ Threads-تەگى جازباسى ناعىز ابىر-سابىر تۋدىرعانىن جازعان بولاتىن. قازاقستاندىق فاتيما ەسىمدى قولدانۋشى توپتىڭ سوليسىمەن تۇسكەن سۋرەتىن جاريالادى.