الەمگە ايگىلى BTS توبىنىڭ مۇشەسى V ءبىر قۇلاعىنىڭ ەستۋ قابىلەتىنىڭ ناشارلاۋىنا بايلانىستى ەم الىپ جاتقانىن ايتتى. بۇل مالىمدەمە توپتىڭ كوپتەن كۇتكەن الەمدىك گاسترولىنىڭ ورتاسىندا جاسالدى.
سارسەنبىدەگى تىكەلەي ەفيردە 30 جاستاعى ءانشى بۇل ماسەلەمەن شامامەن ەكى جارىم جىل بويى كۇرەسىپ كەلە جاتقانىن ايتتى. ول بۇل تۋرالى العاش رەت جانكۇيەرلەرىنە اشىق ايتقانىن دا جەتكىزدى.
«سول قۇلاعىمنىڭ ەستۋ قابىلەتى 100 پايىز بولسا، وڭ قۇلاعىمدا نەبارى 30 پايىز عانا»، — دەدى شىن اتى كيم تە ءحون بولاتىن V. ءقازىر توپ بىرنەشە جىلداعى العاشقى الەمدىك گاسترولىن وتكىزىپ جاتىر. بۇل — مىندەتتى اسكەري قىزمەتتەن كەيىن جەتى مۇشەنىڭ قايتا قوسىلۋىنىڭ بەلگىسى.
تىكەلەي ەفير بارىسىندا V ەستۋ قابىلەتىنىڭ اسكەردە جۇرگەندە ناشارلاعانىن ايتتى. الايدا ول العاشىندا بۇعان ءمان بەرمەگەنىن، ونى «ەرىك-جىگەردىڭ ءىسى» دەپ ويلاعانىن جەتكىزدى.
ءقازىر ءدارى ءىشىپ، ۇنەمى اۋرۋحاناعا بارىپ تۇراتىنىن دا قوستى.
وڭتۇستىك كورەيادا سيرەك جاعدايلاردى قوسپاعاندا، بارلىق جارامدى ەر ادامدار 18 اي مەرزىمگە اسكەري قىزمەت وتەۋى ءتيىس. بۇل تالاپ BTS مۇشەلەرىنە دە قاتىستى. ولار 2022 جىلى اسكەرگە شاقىرىلا باستاعاندا داڭقتىڭ شىڭىندا ەدى.
V 2023 جىلى اسكەرگە الىنىپ، 2025 جىلدىڭ ماۋسىمىندا بوساتىلدى.
ساۋىردە وڭتۇستىك كورەيادا باستالعان Arirang الەمدىك گاسترولى توپتىڭ جەتى مۇشەسىنىڭ كوپتەن كۇتكەن قاۋىشۋى بولدى. سارسەنبىدەگى تىكەلەي ەفير توپتىڭ مەريلەند شتاتىنداعى بالتيمور قالاسىنداعى كونسەرتتەرى اياقتالعان سوڭ ءوتتى.
تىكەلەي ەفيردە V-مەن بىرگە ونىڭ ارىپتەسى چونگۋك تە بولدى. ول گاسترول كەزىندە جىلىنشىك جاراقاتىنا بايلانىستى ەم الىپ جاتقانىن ايتىپ، «سترەسس سىنىعى پايدا بولۋعا جاقىن» ەكەنىن جەتكىزدى. چونگۋك ونەرىن جالعاستىرۋ ءۇشىن جاراقاتىن جاقسى باقىلاۋعا الۋى كەرەك ەكەنىن دە قوستى.
الداعى ايلاردا BTS كونسەرتتەرى لوس-اندجەلەس، بۋەنوس-ايرەس، بانگكوك، سيدنەي جانە گونكونگ سياقتى الەمنىڭ تۇكپىر-تۇكپىرىندەگى قالالاردا وتەدى.