قازاقستاندىق تەننيسشى الەكساندر بۋبليك (20ء-شى سەريا) China Open-2026 ءتۋرنيرىنىڭ جۇپتىق رازريادىندا ءساتتى باستاعان سوڭ، جەكەلەي سىندا چەح ياكۋب مەنشيككە (14) 4:6، 6:7 (5:7) ەسەبىمەن جول بەردى، دەپ حابارلايدى infohub.kz سايتى.
بۋبليك پەكينگە لوندوننان كەلدى. وندا ول دەبيۋتتىك كۋبوك لەيۆەرستە ەكى جۇپتىق جانە ءبىر جەكەلەي ماچ وتكىزدى: قازاقستاندىق الەم قۇراماسى ساپىندا، ال مەنشيك ەۋروپا كومانداسىندا وينادى. ۇلىبريتانيا استاناسىندا ولاردىڭ كورتتاعى جولدارى قيىسپادى. پەكيندەگى كەزدەسۋگە دەيىن مەنشيك جەكە كەزدەسۋلەردە 2:1 ەسەبىمەن الدا بولاتىن.
ءبىرىنشى پارتيادا ءۇشىنشى گەيمدەگى چەحتىڭ برەيكى شەشۋشى بولدى – 6:4. ەكىنشى سەتتىڭ ءۇشىنشى گەيمىندە مەنشيك قايتادان بۋبليكتىڭ بەرىسىن الدى، الايدا الەكساندر بىردەن كەرى برەيك جاسادى. ماچ تاعدىرى تاي-برەيكتە شەشىلدى، ونى ياكۋب ۇتتى.
قورىتىندى – 6:4، 7:6 (7:5) 1 ساعات 36 مينۋتتا. ەيستار بويىنشا بۋبليكتىڭ باسىمدىعى – 10:7، قوس قاتە بويىنشا – 2:1، بارلىق ۇتىلعان ۇپايلار بويىنشا – 81:69 چەحتىڭ پايداسىنا.
جەكەلەي سىننان شىعىپ قالعان بۋبليك (جۇپتىق رەيتينگتە 357ء-شى ورىن) جۇپتىق رازريادتا كۇرەسىن جالعاستىرۋدا. ونىڭ قىتايلىق شان سزيۋنچەنمەن (587) تاندەمى ۋايلد-كارد الىپ، ءبىرىنشى اينالىمدا ارگەنتينالىق-فرانسۋزدىق جۇپ فرانسيسكو چەرۋندولو (141)/ارتۋر ريندەركنەحتى (113) – 3:6، 6:4، 10:7 ەسەبىمەن جەڭدى.
ەلەنا رىباكينا ايەلدەر اراسىنداعى China Open-2026 ءتۋرنيرىنىڭ ءبىرىنشى اينالىمىن وتكىزىپ جىبەردى. ەكىنشى اينالىمدا الەمنىڭ ءبىرىنشى راكەتكاسىنا الينا چاراەۆا (118) قارسىلاس بولادى. سامارا تۋماسى، شىلدە ايىنان باستاپ ارمەنيا تۋى استىندا ونەر كورسەتىپ جۇرگەن ول ستارتتا ۋكراينالىق يۋليا ستارودۋبسەۆانى (45) – 5:7، 7:5، 6:2 ەسەبىمەن جەڭدى. بۇعان دەيىن بۇرىنعى رەسەيلىكتەر كورتتا كەزدەسپەگەن.
اشىق جۇڭگو تەننيس چەمپيوناتى (China Open) بيىل ەرلەر اراسىندا 25ء-شى رەت (ATP-500)، ايەلدەر اراسىندا 27ء-شى رەت (WTA-1000) وتكىزىلۋدە. ءتۋرنيردىڭ جالپى جۇلدە قورى $9،4 ملن قۇرايدى.
ءار جىلدارى حاردتاعى بەدەلدى ءتۋرنيردى مايكل چانگ، دجيم كۋرە، مارات سافين، رافاەل نادال، نوۆاك دجوكوۆيچ، كارلوس الكاراس، سەرەنا ۋيليامس، سۆەتلانا كۋزنەسوۆا، ماريا شاراپوۆا، كارولين ۆوزنياسكي، يگا سۆەنتەك جانە باسقا دا جۇلدىزدار جەڭىپ العان.
پەكين-2025 چەمپيوندارى – يتاليالىق ياننيك سيننەر (1) جانە امەريكالىق اماندا انيسيموۆا (11) – جاراقاتتارىنا بايلانىستى بىلتىرعى كۋبوكتەرىن قورعامايدى.