قازاقستاندىق تەننيسشى الەكساندر بۋبليك لوس-اندجەلەستە وتەتىن 2028 جىلعى وليمپيادا ويىندارىنا، ءتىپتى تەننيس ءتۋرنيرى ۋيمبلدوننان نەبارى ءتورت كۇن وتكەن سوڭ باستالسا دا، قاتىسۋدى جوسپارلاپ وتىرعانىن راستادى. بۇل تۋرالى infohub.kz سايتى حابارلايدى.
«چەمپيونات» سپورت باسىلىمىنا بەرگەن سۇحباتىندا بۋبليك قاتاڭ كەستە ونى الاڭداتپايتىنىن مويىندادى. «ماعان شىنىن ايتقاندا، ءبارىبىر. مەن وليمپياداعا ءوزىم ونەر كورسەتەتىن ەلگە دەگەن قۇرمەت رەتىندە قارايمىن. بۇل قازاقستاندىقتار ءۇشىن قانشالىقتى ماڭىزدى ەكەنىن، ءوزىم ونەر كورسەتەتىن ەل ءۇشىن قانشالىقتى ماڭىزدى ەكەنىن بىلەمىن، مەنى وسى ساتتەر ءۇشىن، نەگىزىنەن، سول ەل ونەر كورسەتۋگە الدى. سوندىقتان ماعان بۇل ۋيمبلدون فينالىنان ءتورت كۇن وتكەن سوڭ با، الدە ءبىر كۇن وتكەن سوڭ با — ەش ايىرماشىلىعى جوق. مەن كەز كەلگەن جاعدايدا كەلەمىن جانە بارىمدى سالامىن»، — دەپ سپورتشىنىڭ ءسوزىن باسىلىم كەلتىرەدى.
ەسكە سالايىق، پاريجدەگى وليمپيادادا قازاقستاننىڭ تەننيس قۇراماسى بىردە-بىر جەڭىسكە جەتە الماعان ەدى. بۋبليك پەن الەكساندر شەۆچەنكو جەكە سىندا ءبىرىنشى اينالىمدا-اق جارىستان شىعىپ قالدى، ال جۇپتىق سىندا بۋبليك پەن الەكساندر نەدوۆەسوۆ تە العاشقى ماچتا ۇتىلدى. ەلەنا رىباكينا مەن يۋليا پۋتينسەۆانىڭ دەنساۋلىعىنا بايلانىستى جارىستان باس تارتۋى سالدارىنان قازاقستاندىق كوماندا ايەلدەر جەكە سىنى مەن ميكستە وكىلدىگىنەن ايىرىلدى.