بۇيرەك وبىرىنا قارسى جەكە ۆاكسينا كلينيكالىق سىناقتىڭ ءبىرىنشى كەزەڭىنەن ءساتتى ءوتتى: قاتىسقان توعىز ناۋقاستىڭ بارلىعىندا يممۋندىق جاۋاپ قالىپتاسىپ، اۋرۋدىڭ قايتالانۋى تىركەلگەن جوق، دەپ حابارلايدى infohub.kz سايتى.
حالىقارالىق زەرتتەۋشىلەر توبى اشىق جاسۋشالى بۇيرەك جاسۋشاسى وبىرىمەن اۋىراتىن ناۋقاستارعا ارنالعان جەكە ۆاكسينا ازىرلەدى. ءبىرىنشى كەزەڭ سىناعىنىڭ قورىتىندىسى بەدەلدى Nature عىلىمي جۋرنالىندا جاريالاندى.
زەرتتەۋگە بۇعان دەيىن ىسىكتى الىپ تاستاۋ وپەراسياسىن جاساعان، اۋرۋدىڭ ءۇشىنشى جانە ءتورتىنشى ساتىسىنداعى توعىز ادام قاتىستى. ءار ناۋقاس ءۇشىن ماماندار الىنعان ىسىك تىنىنەن بولىنگەن اقۋىز فراگمەنتتەرى — نەوانتيگەندەر نەگىزىندە بىرەگەي پرەپارات جاسادى. بەس قاتىسۋشى قوسىمشا يپيليمۋماب يممۋنوتەراپيالىق پرەپاراتىن قابىلدادى.
ورتاشا ءۇش جىل ءتورت ايعا سوزىلعان باقىلاۋ كەزەڭىندە قاتىسۋشىلاردىڭ ەشقايسىسىندا اۋرۋ قايتالانعان جوق. توعىز ناۋقاستىڭ بارلىعىندا تۇراقتى يممۋندىق جاۋاپ قالىپتاسىپ، جەتەۋىندە ت-جاسۋشالار ءوز ىسىگىنىڭ جاسۋشالارىن ءساتتى تانىدى.
پرەپارات قاۋىپسىزدىكتىڭ جوعارى دەڭگەيىن كورسەتتى: ەڭ ءجيى كەزدەسەتىن جاناما اسەرلەر — ينەكسيا ورنىنداعى رەاكسيالار جانە قىسقا مەرزىمدى تۇماۋ بەلگىلەرى. اۋىر جاعىمسىز قۇبىلىستار تىركەلگەن جوق.
جۇمىس اۆتورى يەل ۋنيۆەرسيتەتىنەن دەۆيد براۋن مەن دانا-فاربەر وبىر ينستيتۋتىنان توني شۋەري ودان ءارى زەرتتەۋ قاجەتتىگىن اتاپ ءوتتى. ولاردىڭ ايتۋىنشا، ىرىكتەمەنىڭ شاعىندىعى جانە باقىلاۋ توبىنىڭ جوقتىعى قايتالانۋدىڭ بولماۋى تەك ۆاكسيناسياعا بايلانىستى دەپ سەنىمدى تۇردە ايتۋعا ازىرگە مۇمكىندىك بەرمەيدى.