اۆتورى:
عابيدەن قوجاحمەت،
قىزىلوردا قالاسى

بۇل - ءبىزدىڭ كوك تۋىمىز جەلبىرەگەن!

كونبەستەن بوداندىقتىڭ تۇساۋىنا،
اينالعان ازاتتىقتىڭ نىشانىنا.
تانىتقان ورلىگىڭ مەن ەلدىگىڭدى،
سىيعىزىپ تىنىشتىقتى قۇشاعىڭا.
كۇللى الەم سودان بىلەر سەنى تانىپ،
بالانعان ەركىندىكتىڭ مىسالىنا.
جيھانعا ەڭسە تىكتەپ كوز سالعىزعان
بۇل - ءبىزدىڭ كوك تۋىمىز جەلبىرەگەن!

وزگەگە ۇستەمدىگىن تانىتپاعان،
دەگەندەي جەرىم دە - كەڭ، الىپ - دالام.
التىن كۇن اياسىندا نۇرعا ورانىپ،
قىران قۇس بيىكتە ۇشىپ قالىقتاعان.
كوزىڭە وتتاي ىستىق باسىلاتىن،
قاراۋدان ۇل مەن قىزى جالىقپاعان.
قاراعان جاندا اسەرى تۇنىپ تۇرعان
بۇل - ءبىزدىڭ كوك تۋىمىز جەلبىرەگەن!

تانىتقان جىگەر كۇشتى ەرتەڭىڭنەن،
ول باردا، وزگەمەن ەل تەڭ كورىنگەن.
كۇمبەزدى اسپان تۇستەس تۇتاستىعى
ۇلتىڭنىڭ ويۋىمەن كومكەرىلگەن.
بەرەتىن جاس بالاعا شالقار شابىت،
سول ۇرپاق ءان عىپ ايتقان ءور كوڭىلدەن.
ءتالىمىن كوپ سىڭىرگەن سابيىنە
بۇل - ءبىزدىڭ كوك تۋىمىز جەلبىرەگەن!

كەلىسىم ءار كەز جانجال باستاتپاعان،
اسكەرى قۇرمەت ەتىپ قاس قاقپاعان.
بارعاندا ءوز ەل باسشىڭ شەت ساپارعا
سول ەلدىڭ اسپانىندا اسقاقتاعان.
سەنى ەركىن مەملەكەت دەپ مويىنداتقان،
ءجۇزىڭدى تومەندەتىپ، جاسقانتپاعان.
ءبۇتىن ءبىر ەل اتىنان سويلەپ تۇرعان
بۇل - ءبىزدىڭ كوك تۋىمىز جەلبىرەگەن!

كۇتكىزبەي ساڭلاعىڭنان بەكەر ءۇمىت،
ۇل - قىزىڭ سىننان تالاي وتە ءبىلىپ.
تۇرعاندا جەڭىس - شىڭنىڭ تۇعىرىندا،
اسپانداپ بارا جاتقان كوتەرىلىپ.
اسقاق ءۇن ءانۇراننىڭ ەگىزىندەي،
كورگەن جان بولمىسىڭداي كەتەر ۇعىپ.
سونداعى قۋانىشىڭمەن تولقىندانعان
بۇل - ءبىزدىڭ كوك تۋىمىز جەلبىرەگەن!

بويىندا ۇلت مىنەزى ورىلەتىن،
ەل دەسە، جۇرەكتەن جاس توگىلەتىن
ءار جانعا الۋان تۋدىڭ اراسىنان
بيىكتەپ ەرەكشە، ىستىق كورىنەتىن.
بايقالعان دالامىزدىڭ بەلگىسىندەي،
تاققىزباس وزگەلەردەن ەلىڭە سىن.
تاريحتان تالاي مىسال تۇيىندەتكەن
بۇل - ءبىزدىڭ كوك تۋىمىز جەلبىرەگەن!

ۇرپاقتىڭ قاستەر بولىپ ۇعىمىندا،
اينالىپ ءار بولىگى ۇلى ۇعىمعا.
كوك تۋىڭ ەلدىگىڭنىڭ كورىنىسىندەي،
جەلبىرەي بەرسىن اسقاق تۇعىرىندا!
قاستەرلى تاۋەلسىزدىك جارشىسىنداي
ماقتانىش بولسىن قىز بەن بۇگىن ۇلعا.
سان جۇرەك ۇلىقتاعان ۇلى بايراق
بۇل - ءبىزدىڭ كوك تۋىمىز جەلبىرەگەن!