13 تامىز تاڭەرتەڭ بۋرابايداعى كوكشەتاۋ تاۋىندا ءورت شىعىپ، ول تەز ارادا وقشاۋلاندى. وت تەك 0،002 گەكتار ورمان القابىن شالىپ، ۇلكەن اۋماققا تاراعان جوق، دەپ حابارلايدى infohub.kz.
ءورت وشاعى ساعات 07:30-دا «بۋراباي» ۇلتتىق پاركىنىڭ بوروۆسكوي ورمانشىلىعى اۋماعىندا انىقتالدى. «بۋراباي» مۇتپ ءباسپاسوز قىزمەتىنىڭ مالىمەتىنشە، ءورت كوكشەتاۋ تاۋىندا، 10-شى كۆارتال، 8ء-شى بولىكتە، تەڭىز دەڭگەيىنەن 300 مەتردەن استام بيىكتىكتە تىركەلگەن. ورمانمەن كومكەرىلگەن اۋماقتاعى ءورت اۋدانى 0،002 گەكتاردى قۇرادى.
وقيعا ورنىنا ۇلتتىق پاركتىڭ كۇشى مەن قۇرالدارى دەرەۋ جۇمىلدىرىلدى. ءورتتى سوندىرۋگە «بۋراباي» مۇتپ-نىڭ 10 قىزمەتكەرى، ءورت ءسوندىرۋ ماشيناسى جانە شاعىن ورمان ءورتىن ءسوندىرۋ كەشەنى قاتىستى. سونداي-اق جۇمىسقا «قازاۆياورمانقورعاۋ» رمقك تىكۇشاعى تارتىلدى.
ۇيلەسىمدى ارەكەتتەردىڭ ارقاسىندا ءورتتىڭ ورمان القابىنا تارالۋىنا جول بەرىلمەدى. قازىرگى ۋاقىتتا ماماندار ءورتتىڭ شىعۋ سەبەبىن انىقتاپ جاتىر.
ۇلتتىق پارك ءورت ءقاۋپى جوعارى كەزەڭدە ءتىپتى شاعىن ءورت وشاعى دا ورمانعا ۇلكەن ءقاۋىپ ءتوندىرۋى مۇمكىن ەكەنىن ەسكە سالدى. پارك تۇرعىندارى مەن قوناقتارىن ءورت قاۋىپسىزدىگى تالاپتارىن قاتاڭ ساقتاۋعا جانە ءورتتىڭ كەز كەلگەن بەلگىلەرى تۋرالى دەرەۋ ۇلتتىق پارك قىزمەتكەرلەرىنە نەمەسە 112 نومىرىنە حابارلاۋعا شاقىردى.
بۇعان دەيىن بۋرابايداعى ايگىلى كوكشەتاۋ مەن بولەكتاۋ تاۋلارىنا تۋريستەردىڭ شىعۋىنا تىيىم سالىنعانى حابارلانعان بولاتىن.