اقمولا وبلىسىنىڭ بۋراباي ەلدى مەكەنىندە Network City حالىقارالىق تەحنولوگيالىق قالاشىعىن سالۋ جوسپارلانۋدا. بۇل قالاشىق الەمنىڭ تۇكپىر-تۇكپىرىنەن IT ماماندارىن، كاسىپكەرلەر مەن زەرتتەۋشىلەردى تارتاتىن ورتالىققا اينالماق.
جوبا قازاقستان پرەمەر-مينيسترى ولجاس بەكتەنوۆتىڭ Network School حالىقارالىق قوعامداستىعىنىڭ نەگىزىن قالاۋشى، شىعۋ تەگى ءۇندىستاندىق امەريكاندىق كاسىپكەر بالادجي شرينيۆاسانمەن كەزدەسۋىندە تالقىلاندى. بالادجي شرينيۆاسان كرەمني القابىنىڭ بيوتەحنولوگيا، كريپتوۆاليۋتا، جاساندى ينتەللەكت جانە تەحنولوگيالىق كاسىپكەرلىك سالالارىندا جۇمىس ىستەيتىن ىقپالدى وكىلدەرىنىڭ ءبىرى رەتىندە تانىمال.
ازىرلەۋشىلەر مەن ستارتاپتارعا ارنالعان بۇل قالا بۋرابايدىڭ تابيعي لاندشافتىنا ۇيلەستىرىلگەن مودۋلدىك ينفراقۇرىلىمدى سالۋدى كوزدەيدى. كەيىننەن باستامانى Alatau City-گە دە تاراتۋ جوسپارلانۋدا. Network City-دە ءبىلىم بەرۋ باعدارلامالارىن، كوۆوركينگتەردى، كونفەرەنسيالاردى، حاكاتونداردى جانە ستارتاپ اكسەلەراتورلارىن بىرىكتىرۋ كوزدەلگەن. جوبا اۆتورلارىنىڭ ويىنشا، مۇندا ءارتۇرلى ەلدەردىڭ ازىرلەۋشىلەرى، ينجەنەرلەرى، كاسىپكەرلەرى مەن زەرتتەۋشىلەرى جۇمىس ىستەپ، وقىپ، تاجىريبە الماسا الادى.
سونىمەن قاتار، تاراپتار قازاقستاندا AI Film Festival وتكىزۋ ماسەلەسىن تالقىلادى. بۇل فەستيۆالدىڭ جۇلدە قورىن بالادجي شرينيۆاسان قامتاماسىز ەتەدى. سونداي-اق AI & Digital Bridge فورۋمى اياسىندا الەمدىك تەحنولوگيالىق كومپانيالاردىڭ قاتىسۋىمەن Network State Conference وتكىزۋ جوسپارلانۋدا.
بالادجي شرينيۆاسان قازاقستاننىڭ جاساندى ينتەللەكت سالاسىنداعى الەۋەتىن جوعارى باعالاپ، ەلدىڭ جاھاندىق تەحنولوگيالىق ەكوجۇيەنىڭ بولىگى بولا الاتىنىنا سەنىمدى ەكەنىن ايتتى. ول سونداي-اق Network School جوبالارى تەك جەكە ينۆەستيسيالار ەسەبىنەن جۇزەگە اسىرىلاتىنىن جانە مەملەكەتتىك قارجىلاندىرۋدى قاجەت ەتپەيتىنىن اتاپ ءوتتى.
ولجاس بەكتەنوۆتىڭ ايتۋىنشا، قازاقستان حالىقارالىق ساراپتامانى تارتۋعا جانە الەمدىك تەحنولوگيالىق قاۋىمداستىقپەن ىنتىماقتاستىقتى دامىتۋعا مۇددەلى. «ادام كاپيتالىن، ءبىلىم بەرۋدى، عىلىم مەن يننوۆاسيانى دامىتۋ – مەملەكەتتىك ساياساتتىڭ ستراتەگيالىق باعىتتارىنىڭ ءبىرى. جاساندى ينتەللەكتتىڭ ەل دامۋىنداعى رولىنە جانە ازاماتتاردىڭ جەكە دەرەكتەرىن قورعاۋعا ەرەكشە كوڭىل بولىنەدى»، – دەدى پرەمەر-مينيستر. ول قازاقستاندا Digital Qazaqstan ستراتەگياسى جۇزەگە اسىرىلىپ جاتقانىن، سونداي-اق Astana Hub، ەكىباستۇزداعى «دەرەكتەر ورتالىقتارى القابى» جانە TUMO مەن Tomorrow School ءبىلىم بەرۋ باعدارلامالارى جۇمىس ىستەيتىن Alem.ai حالىقارالىق جاساندى ينتەللەكت ورتالىعى سىندى ءىرى سيفرلىق جوبالار دامىپ جاتقانىن ەسكە سالدى.
كەزدەسۋ قورىتىندىسى بويىنشا پرەمەر-مينيستر ءپروفيلدى مەملەكەتتىك ورگاندارعا جوبانى جۇزەگە اسىرۋعا جاردەمدەسۋدى تاپسىردى.
بۇعان دەيىن «كۋرسيۆ» قازاقستاننىڭ وزىندىك «دەرەكتەر ورتالىقتارى القابىن» – ەكىباستۇزدا دەرەكتەردى وڭدەۋ ورتالىقتارىنا ارنالعان ۇلكەن تەحنوپارك قۇرىپ جاتقانىن جازعان بولاتىن. بيلىك Microsoft، Google جانە Amazon كومپانيالارىمەن ولاردىڭ وسىندا ءوز سەرۆەرلىك قۋاتتارىن سالۋى ءۇشىن كەلىسسوز جۇرگىزۋدە.