الماتى قالالىق ءماسليحاتىنىڭ بۇرىنعى دەپۋتاتى يگور پروسەنكو ءوزىنىڭ «تورنادو PLUS» جيھاز كومپانياسىنداعى ۇلەسىن ساتۋعا دايىن ەكەنىن مالىمدەدى. كاسىپورىن نارىقتا 1994 جىلدان بەرى جۇمىس ىستەپ كەلەدى، الايدا سوڭعى كەزدەرى ساتۋدا ەلەۋلى قيىندىقتارعا تاپ بولدى، دەپ حابارلايدى infohub.kz سايتى.
كاسىپكەر Facebook-تەگى پاراقشاسىندا كومپانيا تاريحىندا العاش رەت بانك نەسيەسىن ۋاقىتىندا وتەي الماعانىن ايتتى. ونىڭ ايتۋىنشا، بانك قارىزدى قايتا قۇرىلىمداۋعا دايىن، ءبىراق باستى ماسەلە – تاپسىرىستاردىڭ بولماۋى.
«وتكەن جىلدى ءبىز وتە جاقسى اياقتادىق. كورپوراتيۆتىك سەكتوردان بولشەك ساۋداعا باسىمدىق بەردىك، كولەمدەر ءۇش ەسەگە جۋىق ءوستى، كومپانيا شتاتى 146 ادامعا جەتتى. جاڭا جىلدان باستاپ ءبىز جۇمىس ىستەگەن بولشەك ساۋدا جەلىسىندە ساتىلىم كۇرت تومەندەدى. ونىمەن بىرگە ءبىز دە قۇلدىرادىق»، – دەدى پروسەنكو.
كاسىپكەر ءساۋىر ايىندا-اق «تورنادو PLUS» كومپانياسىنداعى 100% ۇلەسىن ساتۋ نيەتى تۋرالى حابارلاعان بولاتىن. ءقازىر ول بىرنەشە نۇسقانى قاراستىرۋدا. ونىڭ ءبىرى – نەسيەلەردى جابۋ ءۇشىن 4،5 مىڭ شارشى مەتر سەحتى قوسا العاندا، وندىرىستىك بازانى ساتۋ. الايدا بۇل جاعدايدا، ونىڭ ايتۋىنشا، قۇنى شامامەن 700 ملن تەڭگە بولاتىن جابدىق ماسەلەسى شەشىلمەي قالادى، ال بولاشاقتا سەح جۇمىسىن قايتا باستاۋ ءۇشىن ءۇي-جايدى جالعا الۋعا تۋرا كەلەدى.
كاسىپكەر جاڭا سەرىكتەستەر ىزدەپ، ولارعا بيزنەس ۇلەسىن ساتۋعا بەيىم. پروسەنكو جاڭا سەرىكتەسپەن بىرگە كومپانيانى جاڭارتىپ، جاڭا باعىت – وندىرىستىك ءۇي-جايلاردى جالعا بەرۋدى يگەرگىسى كەلەدى. ول 1 گەكتار اۋماقتاعى مەنشىكتى وندىرىستىك بازاعا يە.
«ءبىز قولدانىستاعى وندىرىستىك كەشەندى بىرتىندەپ شاعىن ونەركاسىپتىك پارككە اينالدىرعىمىز كەلەدى. ءتيىستى مارتەبە بىزدە بار. ءوندىرىس ساقتالىپ، كەشەننىڭ نەگىزگى بيزنەسىنە اينالادى. ءبىراق سونىمەن قاتار ءبىز تۇراقتى ءارى بولجامدى باعىتقا – وندىرىستىك، قويما جانە كەڭسە ءۇي-جايلارىن جالعا بەرۋگە كوڭىل بولە باستايمىز. ءقازىر بىزدە وسىنداي الاڭداردىڭ شامامەن 4،5 مىڭ شارشى مەترى بار. تاعى شامامەن 3،2 مىڭ شارشى مەتر سالۋدىڭ دايىن جوباسى بار»، – دەدى يگور پروسەنكو.
جوسپارلار جۇزەگە اسقان جاعدايدا كاسىپكەر بىرنەشە جىل ىشىندە بۇكىل اكتيۆتىڭ كاپيتاليزاسياسىن 2،5–3 ەسەگە ارتتىرۋدى كوزدەپ وتىر.
ايتا كەتەيىك، «تورنادو PLUS» جيھاز كومپانياسىنىڭ نەگىزىن قالاۋشى ءۇش جىل بويى الماتى قالالىق ءماسليحاتىنىڭ دەپۋتاتى بولدى. ول كاسىپكەرلىكتى دامىتۋ جونىندەگى ءتۇرلى سالالىق جانە ايماقتىق ۇيىمداردىڭ قۇرامىنا كىردى. 2026 جىلدىڭ مامىر ايىندا ول ءماسليحات دەپۋتاتى وكىلەتتىگىن ءوز ەركىمەن توقتاتتى.
بۇعان دەيىن قاراعاندى وبلىسىنىڭ دەپۋتاتى اقش-تان سۋارۋ جۇيەلەرىن شىعاراتىنى حابارلانعان بولاتىن.