بىرىككەن ۇلتتار ۇيىمىنىڭ باس اسسامبلەياسى افريكانىڭ ناقتى كولەمىن كورسەتەتىن جاڭا الەم كارتاسىن ماقۇلدادى. بۇل — افريكالىق ەلدەر مەن بەلسەندى توپتاردىڭ بىرنەشە جىلعى ناۋقانىنىڭ ناتيجەسى، دەپ حابارلايدى infohub.kz سايتى.
جۇما كۇنى قابىلدانعان قاراردى توگو ۇسىنىپ، افريكا وداعىنا مۇشە ەلدەر قولدادى. داۋىس بەرۋگە قاتىسقان 164 مەملەكەتتىڭ بارلىعى قاراردى قولدادى. تەك اقش قارسى داۋىس بەردى، ال سەربيا، ەستونيا، گرۋزيا، ليتۆا، مولدوۆا جانە ۋكراينا — قالىس قالدى.
قارار الەمدەگى ۇكىمەتتەر مەن مەكەمەلەردى XVI عاسىردان بەرى كەڭىنەن قولدانىلىپ كەلە جاتقان ءداستۇرلى مەركاتور كارتاسىن، گەوگرافتاردىڭ پىكىرىنشە، اۋماقتاردى دالىرەك كورسەتەتىن Equal Earth پروەكسياسىنا اۋىستىرۋعا شاقىرادى.
مەركاتور پروەكسياسىندا گرەنلانديا مەن افريكا شامامەن بىردەي كولەمدە كورىنەدى، ال Equal Earth پروەكسياسىندا قۇرلىقتار ناقتى پروپورسيادا بەينەلەنگەندىكتەن، افريكا گرەنلانديادان 14 ەسە ۇلكەن بولىپ كورىنەدى.
بۇۇ بايانداماسىندا اتاپ وتىلگەندەي، جۇماداعى قارار مەركاتور پروەكسياسىنا تىيىم سالمايدى جانە ونى مىندەتتى تۇردە اۋىستىرۋدى تالاپ ەتپەيدى، تەك Equal Earth پروەكسياسىن قولدانۋعا شاقىرادى.
داۋىس بەرۋ الدىندا بۇۇ توگو سىرتقى ىستەر ءمينيسترى روبەرت ديۋسسەيدىڭ ءسوزىن كەلتىردى: «كارتالار الەمدى قابىلداۋىمىزدى قالىپتاستىرادى. ولار بىلىمگە باعىت بەرەدى، قيالدى قورەكتەندىرەدى جانە ۇجىمدىق كوزقاراسقا اسەر ەتەدى».
جاڭا كارتانى قابىلداۋ ناۋقانىن باستاعان Africa No Filter ۇيىمى قاراردى قۇپتاپ، «مەكتەپتەردە، وقۋلىقتاردا، جاڭالىقتار بولمەلەرىندە، بيزنەستە جانە ميللياردتاعان ادام كۇن سايىن پايدالاناتىن سيفرلىق پلاتفورمالاردا ناقتى كارتالاردى كورگىمىز كەلەدى» دەپ مالىمدەدى.
بىرنەشە ەل بۇل شەشىمدى قۇپتاپ، Equal Earth كارتاسىن قولدانۋعا شاقىردى. فرانسيانىڭ سىرتقى ىستەر ءمينيسترى جان-نوەل باررو داۋىس بەرۋدەن كەيىن الەۋمەتتىك جەلىدە: «كارتانى وزگەرتۋ الەمدى وزگەرتپەيتىنى انىق. ءبىراق ونى بۇرمالايتىن كورىنىستى تۇزەتۋ — بۇل اقيقاتقا جاسالعان قادام» دەپ جازدى.
مەركاتور كارتاسىن فلاماند كارتوگرافى گەراردۋس مەركاتور تەڭىزشىلەرگە باعىت بەرۋ ءۇشىن جاساعان بولاتىن. الايدا بەلسەندىلەردىڭ ايتۋىنشا، بۇل كارتا سولتۇستىك امەريكا مەن گرەنلانديا سياقتى پوليۋسكە جاقىن ايماقتاردى ۇلكەيتىپ، افريكا مەن وڭتۇستىك امەريكانى كىشىرەيتىپ، قۇرلىقتاردىڭ كولەمىن بۇرمالايدى.
ال 2018 جىلى جاسالعان Equal Earth پروەكسياسى جەردىڭ قيسىقتىعىن ەسكەرىپ، قۇرلىقتاردى ناقتى پروپورسيادا كورسەتەدى.
گەوگرافتاردىڭ پىكىرىنشە، ءداستۇرلى كارتا تەك ناۆيگاسيا ءۇشىن عانا جارامدى. سيراكۋز ۋنيۆەرسيتەتىنىڭ گەوگرافيا پروفەسسورى مارك مونمونەر: «وسى تار ناۆيگاسيالىق قولدانۋ اياسىنان تىس، ونى پايدالانۋدىڭ ەش ءمانى جوق» دەدى.