چاد حالىقارالىق قىلمىستىق سوتتان (حقس) شىعاتىنىن مالىمدەپ، بۇل سوتتى تيىمسىزدىكتە جانە افريكالىق ەلدەرگە قاتىستى ادىلەتسىزدىكتە ايىپتادى. باتىس افريكا ەلى بىرىككەن ۇلتتار ۇيىمىنا (بۇۇ) سوتتان شىعۋ تۋرالى حات جولدادى. حقس – ادامزاتقا قارسى ەڭ اۋىر قىلمىستاردى جاساعانداردى سوتتايتىن حالىقارالىق ورگان، ونىڭ نەگىزگى قۇجاتى – ريم ستاتۋتى. شىعۋ ءراسىمى كەمىندە ءبىر جىلعا سوزىلادى. ...دەپ حابارلايدى infohub.kz سايتى.
چاد 2025 جىلدان بەرى حقس-تان شىعاتىن ءتورتىنشى افريكالىق ەل بولدى. بۇعان دەيىن نيگەر، مالي جانە بۋركينا-فاسو وتكەن جىلى گااگاداعى سوتتان شىعاتىنىن جاريالاعان ەدى.
سوت اۋىر سىن-قاتەرلەرگە تاپ بولۋدا. 24 شىلدەدە باس پروكۋرور كاريم حان جىنىستىق سيپاتتاعى تەرىس قىلىقتارعا بايلانىستى قىزمەتىنەن الىندى. اقش مەملەكەتتىك حاتشىسى ماركو رۋبيو وسى ايدىڭ باسىندا اقش حقس-تىڭ ەگەمەندىككە قاتەر توندىرەتىنىن ايتىپ، ونى جويۋ ناۋقانىن باستايتىنىن مالىمدەدى. 2025 جىلعى اقپاندا اقش پرەزيدەنتى دونالد ترامپ قول قويعان اتقارۋشى بۇيرىق اقش-تىڭ وداقتاسى ءيزرايلدى تەرگەۋىنە بايلانىستى سوتقا سانكسيا سالدى.
اقش-تىڭ افريكا ىستەرى بيۋروسى دۇيسەنبى كۇنى ح (بۇرىنعى Twitter) الەۋمەتتىك جەلىسىندەگى جازباسىندا 125 مۇشە مەملەكەتتىڭ اراسىنان باسقالارىن دا ريم ستاتۋتىنان شىعۋعا شاقىردى. «امەريكا قۇراما شتاتتارى چادتىڭ حقس-تان شىعۋ جانە وسى جەتىلمەگەن ينستيتۋتتان ءوز ەگەمەندىگىن قايتارىپ الاتىن ەلدەر سانىنا قوسىلۋ تۋرالى شەشىمىن قۇپتايدى»، — دەلىنگەن مەكەمە مالىمدەمەسىندە.