قىتايلىق Changan Auto اۆتوكونسەرنى Avatr جانە Deepal برەندتەرىنىڭ ىشكى پروسەستەرىن بىرىكتىرەتىن AD Collaborative Development Department اتتى جاڭا بولىمشە قۇردى، دەپ حابارلايدى infohub.kz سايتى.
قۇرىلىمنىڭ اتاۋى ەكى ماركانىڭ باس ارىپتەرىنەن قۇرالعان. بولىمشە برەندتەردىڭ ورتاق پروسەستەرىمەن اينالىسادى، ال Avatr قوسىمشا ديزاين، ءونىم ازىرلەۋ جانە پلاتفورمالىق تەحنولوگيالار بويىنشا بىرلەسكەن ورتالىقتار اشادى.
ماركالار ازىرلەۋ، ءوندىرىس، ساتىپ الۋ جانە اكىمشىلىك جۇمىستاردا رەسۋرستاردى بىرلەسىپ پايدالانادى، الايدا تاۋەلسىزدىگىن ساقتايدى. Avatr مەن Deepal-دىڭ ساتىلىمى، ءيميدجى جانە پوزيسيالانۋى بولەك قالادى.
Changan شىعىندى 20–30%-عا قىسقارتۋدى جوسپارلاپ وتىر. كومپانيادا اۆتوكولىك يەلەرىنىڭ قۇقىقتارى مەن مۇددەلەرى وزگەرمەيتىنىنە ۋادە بەردى.
بۇل شەشىم برەندتەردىڭ ءارتۇرلى سەرپىنى اياسىندا قابىلداندى. قىمبات ەلەكتروموبيل سەگمەنتىندەگى Avatr 2026 جىلدىڭ ءبىرىنشى جارتىجىلدىعىندا 27،6 مىڭ كولىك جەتكىزدى – بۇل وتكەن جىلعىدان 51،3%-عا از.
Deepal بولسا، سول كەزەڭدە الەم بويىنشا 164،2 مىڭ اۆتو ساتىپ، كورسەتكىشتى 14،6%-عا ارتتىردى. شەتەلگە جەتكىزىلىم 141%-عا ءوسىپ، 35،8 مىڭ كولىككە جەتتى.
ىشكى پروسەستەردى بىرىكتىرۋ Avatr-دىڭ گونكونگتەگى IPO-عا دايىندىعى اياسىندا ءجۇرىپ جاتىر. كومپانيا 2026 جىلدىڭ ماۋسىمىندا پروسپەكتىنى قايتا تاپسىردى، سوندىقتان قۇرىلىمنىڭ وزگەرۋى رەتتەۋشىلەردىڭ قوسىمشا نازارىن اۋدارۋى مۇمكىن.
2030 جىلعا قاراي Changan Avatr مەن Deepal-دىڭ جالپى جىلدىق ساتىلىم كولەمىن 1،5 ملن-نان استام اۆتوموبيلگە جەتكىزۋدى جوسپارلاپ وتىر.
بۇعان دەيىن كۋرسيۆ اۆتو Deepal مەن Avatr قازاقستاندا 2026 جىلدىڭ كۇزىندە رەسمي تۇردە پايدا بولاتىنىن جازعان ەدى.