قىتايلىق Changan اۆتوكومپانياسى ءوزىنىڭ تانىمال CS55 Plus كروسسوۆەرىنىڭ جاڭا گيبريدتى نۇسقاسىن جاريا ەتتى. CS55 Plus HEV دەپ اتالاتىن جاڭالىق وزدىگىنەن زاريادتالاتىن گيبريدتى جۇيەمەن جابدىقتالعان جانە 18 تامىزدا ساتىلىمعا شىعادى، دەپ حابارلايدى infohub.kz سايتى.
گيبريدتى قوندىرعىنىڭ نەگىزىنە 148 ات كۇشى بار 1،5 ليترلىك تۋربوكومپرەسسورلى قوزعالتقىش الىنعان. موتور 241 ات كۇشى بار ەلەكتر اگرەگاتىمەن جانە سىيىمدىلىعى 1،7 كيلوۆاتت-ساعات بولاتىن ىقشام باتارەيامەن جۇپتاسادى. BlueCore تەحنولوگياسىنىڭ ارقاسىندا بەنزين قوزعالتقىشى 500 بار قىسىممەن تىكەلەي وتىن بۇركۋ جۇيەسىمەن جابدىقتالعان جانە جىلۋ تيىمدىلىگىنىڭ ەڭ جوعارى كورسەتكىشى 44،28 پايىزعا جەتەدى.
كومپانيانىڭ مالىمدەۋىنشە، مۇنداي قۋات قوندىرعىسى قالالىق سيكلدە جانارماي شىعىنىن 100 شاقىرىمعا ءۇش ليترگە دەيىن تومەندەتۋگە مۇمكىندىك بەرەدى. سونىمەن قاتار، باتارەيا سىرتقى جەلىدەن زاريادتاۋدى قاجەت ەتپەيدى — ول اۆتوموبيل قوزعالىسى كەزىندە ەنەرگيا قورىن تولىقتىرادى.
گيبريدتى CS55 Plus ستاندارتتى نۇسقادان Vء-تارىزدى رادياتور تورى بار جاڭارتىلعان الدىڭعى بامپەرىمەن، اەروديناميكالىق دوڭگەلەك ديسكىلەرىمەن جانە كوك ءتۇستى HEV ەمبلەماسىمەن ەرەكشەلەنەدى. كروسسوۆەردىڭ ولشەمدەرى: ۇزىندىعى 4550 ميلليمەتر، ەنى 1868 ميلليمەتر، بيىكتىگى 1675 ميلليمەتر، ال دوڭگەلەك بازاسى 2656 ميلليمەتردى قۇرايدى.
جاڭا گيبريدتى نۇسقانىڭ باعاسى ازىرگە جاريالانعان جوق. سالىستىرۋ ءۇشىن، قىتايداعى بەنزيندىك CS55 Plus 93 مىڭنان 110 مىڭ يۋانعا دەيىن تۇرادى، بۇل قازىرگى باعام بويىنشا شامامەن 6،5–7،7 ميلليون تەڭگەگە تەڭ.
بۇعان دەيىن Changan 2026 جىلدىڭ ءبىرىنشى جارتىجىلدىعىنىڭ قورىتىندىسى بويىنشا قازاقستانداعى ەڭ جىلدام دامىپ كەلە جاتقان برەند اتانعانى حابارلانعان بولاتىن. سونىمەن قاتار، برەندتىڭ ەڭ كوپ ساتىلاتىن مودەلى ءداستۇرلى ىشتەن جاناتىن قوزعالتقىشى بار CS55 Plus بولىپ تابىلادى. قازاقستانداعى رەسمي ديلەرلەردە بۇل كروسسوۆەر باسقا كۋزوۆتا ۇسىنىلعان جانە ونىڭ باعاسى 9،3 ميلليون تەڭگەدەن باستالادى.