«اتىراۋ» فۋتبول كلۋبى باس جاتتىقتىرۋشى ۆلاديمير چەبۋرينمەن ىنتىماقتاستىقتى توقتاتقانىن رەسمي تۇردە حابارلادى. قازاقستاندىق مامان ءوز كەتۋىنە قاتىستى بەينەۇندەۋ جازىپ، پىكىر ءبىلدىردى، دەپ حابارلايدى infohub.kz.
چەبۋرين بيىلعى جىلدىڭ ناۋرىز ايىندا «اتىراۋ» كومانداسىن باسقارعان بولاتىن. ونىڭ جەتەكشىلىگىمەن كوماندا قازاقستان پرەمەر-ليگاسىندا 19 ويىن وتكىزىپ، 19 ۇپاي جيناپ، تۋرنير كەستەسىندە 13-ورىنعا تۇراقتادى. باپكەردىڭ ايتۋىنشا، تاراپتار ءوزارا كەلىسىم بويىنشا اجىراسقان.
«„اتىراۋ“ باسشىلىعىنا العىسىمدى بىلدىرگىم كەلەدى. بەرىلگەن مۇمكىندىكتەر ءۇشىن راحمەت! مەن باسقا ادامداردىڭ كومانداسىنا كەلدىم، باسشىلىق اۋىستى. قازىرگى جاعداي وسىنداي. بارلىق باپكەرلىك شتابقا، ۇزاق ۋاقىت بويى مەنىمەن بىرگە بولعان ويىنشىلارعا راحمەت»، — دەدى چەبۋرين.
ءوز كەزەگىندە كلۋب 61 جاستاعى مامانعا «جۇمىسى، كاسىبيلىگى جانە كومانداعا قوسقان ۇلەسى» ءۇشىن العىس ءبىلدىردى. «بىرگە وتكىزگەن ۋاقىت، جەڭىستەر مەن قيىن ساتتەر كلۋب تاريحىنىڭ ءبىر بولىگى بولىپ قالادى. ۆلاديمير نيكولاەۆيچكە ساتتىلىك، مىقتى دەنساۋلىق جانە بولاشاق مانسابىندا جاڭا جەڭىستەر تىلەيمىز!» — دەلىنگەن «اتىراۋ» مالىمدەمەسىندە.
جاڭا باس جاتتىقتىرۋشىنىڭ اتى ازىرگە رەسمي تۇردە جاريالانعان جوق. ينسايدەرلەردىڭ اقپاراتىنا سۇيەنسەك، بىرنەشە كۇن بۇرىن تۇركىستاننىڭ «تۇران» كومانداسىنىڭ باپكەرلىك شتابىندا اسسيستەنت قىزمەتىنەن كەتكەن سامات سماقوۆتىڭ تاعايىندالۋ ىقتيمالدىعى جوعارى.