اعىلشىندىق «چەلسي» مەن مالايزيالىق «دجوحور دارۋل تازيم» اراسىنداعى ماۋسىم الدىنداعى جولداستىق كەزدەسۋ تەڭ اياقتالدى. ماچ مالايزيانىڭ ەكىنشى ۇلكەن قالاسى دجوحور-بارۋداعى «سۋلتان يبراگيم» ستاديونىندا ءوتتى، دەپ حابارلايدى infohub.kz.
الاڭ يەلەرى ءۇش گول سوقتى: 15-مينۋتتا مالايزيالىق جارتىلاي قورعاۋشى اريف ايمان، 65-مينۋتتا يسپاندىق ۆينگەر وسكار ارريباس، ال 87-مينۋتتا برازيليالىق شابۋىلشى بەرگسون مەرگەندىك تانىتتى. قوناقتاردىڭ اتىنان اعىلشىن شابۋىلشىسى ليام دەلاپ پەنالتيدەن دۋبل جاسادى (43 جانە 62-مينۋتتار). سوڭعى نۇكتەنى 89-مينۋتتا يسپاندىق قورعاۋشى انتونيو گلاۋدەردىڭ اۆتوگولى قويدى.
قازاقستان قۇراماسىنىڭ شابۋىلشىسى داستان ساتپايەۆ ماچتى قوسالقى قۇرامدا باستاپ، 87-مينۋتتا سەنەگالدىق شابۋىلشى نيكولاس دجەكسوننىڭ ورنىنا الاڭعا شىقتى. ساتپايەۆ «چەلسي» ساپىندا ماۋسىم الدىنداعى دايىندىقتى تولىققاندى وتكىزىپ جاتىر. 12 تامىزدا وعان 18 جاس تولادى، سودان كەيىن قازاقستاندىق لوندوندىق كلۋب ءۇشىن رەسمي ويىنداردا ونەر كورسەتە الادى.
«چەلسي» سوڭعى جولداستىق ماچىن 15 تامىزدا ءوز الاڭىندا «ستەمفورد بريدج» ستاديونىندا يسپاندىق «رەال سوسەدادقا» قارسى وتكىزەدى.