الماتىدا FIDE World University Team Chess Championship-2026 ۋنيۆەرسيتەتتەر اراسىنداعى كوماندالىق الەم چەمپيوناتى اياقتالدى. جارىستا ەكاتەرينبۋرگتەگى ورال مەملەكەتتىك تاۋ-كەن ۋنيۆەرسيتەتىنىڭ كومانداسى جەڭىسكە جەتتى. قازاق ۇلتتىق سپورت ۋنيۆەرسيتەتىنىڭ كومانداسى ءۇشىنشى ورىنعا يە بولدى، دەپ حابارلايدى infohub.kz سايتى.
فينالدىق كەزدەسۋدە ەكاتەرينبۋرگ پەن سەنت-لۋيس كوماندالارى سەگىز پارتيانىڭ التاۋىندا تەڭ وينادى. رەسەيلىكتەردىڭ جەڭىسىنە حالىقارالىق شەبەر ليا گاريفۋللينا شەشۋشى ۇلەس قوستى. ول امەريكالىق ايەلدەر گروسسمەيستەرى تاليا كەرۆانتەس-لاندەيرونى ەكى رەت جەڭدى.
قولا مەدال ءۇشىن وتكەن ماچ ءتۋرنيردىڭ ناعىز كوركىنە اينالدى. ءبىرىنشى تۋردا جەڭىلگەن قازاقستاندىق شاحماتشىلار ەكىنشى تۋردا رەۆانش الدى. نەگىزگى ۋاقىت تەڭ اياقتالدى، بليس تە تەڭ بولدى. «ارماگەددون» فورماتىنداعى سۋپەربليستە قازىبەك نوگەربەك ءۇندىستاندىق گروسسمەيستەر اديتي سامانتتى جەڭىپ، كومانداسىنا قولا جۇلدەنى اكەلدى.
چەمپيوناتتى ۇيىمداستىرۋشىلار — فيدە، ق ر تۋريزم جانە سپورت مينيسترلىگى، ق ر عىلىم جانە جوعارى ءبىلىم مينيسترلىگى، قازاقستان شاحمات فەدەراسياسى جانە الماتى قالاسىنىڭ اكىمدىگى. باس سەرىكتەستەر — Freedom كومپانيالار توبى جانە «شاپاعات» كورپوراتيۆتىك قورى.
ءتۋرنيردىڭ جۇلدە قورى 50 مىڭ ەۋرونى قۇرادى. رەسەيلىك جەڭىمپازدار 25 مىڭ ەۋرو، امەريكالىق ۆيسە-چەمپيوندار 15 مىڭ ەۋرو، ال قازاقستاندىق كوماندا 10 مىڭ ەۋرو الدى.