Chevrolet Cobalt قازاقستان مەن وزبەكستان نارىعىنداعى ەڭ سۇرانىسقا يە مودەلدەردىڭ ءبىرى بولىپ قالا بەرەدى. الايدا كورشى ەلدە بۇل سەدان ساتىپ الۋشىعا ارزانعا تۇسەدى. ال تانىمال كروسسوۆەرلەردىڭ ءبىرقاتارىن، كەرىسىنشە، قازاقستاننان ساتىپ العان ءتيىمدى، دەپ حابارلايدى infohub.kz سايتى.
2026 جىلى شىعارىلعان، 1،5 ليترلىك قوزعالتقىشپەن جانە اۆتوماتتى بەرىلىس قورابىمەن جابدىقتالعان Chevrolet Cobalt قازاقستاندا 6،5 ملن تەڭگەدەن باستاپ ۇسىنىلادى. قىركۇيەك ايىنىڭ سوڭىنداعى اعىمداعى باعام بويىنشا بۇل شامامەن 171 ملن سۋمدى قۇرايدى. وزبەكستاندا Cobalt Style MCM نۇسقاسى 156،1 ملن سۋم تۇرادى. وسىلايشا، ايىرماشىلىق شامامەن 15 ملن سۋمدى، ياعني 570 مىڭ تەڭگەنى قۇرايدى، ال قازاقستاندىق باعا شامامەن 10%-عا جوعارى بولىپ شىعادى.
ايتا كەتەيىك، وزبەكستاندا 2026 جىلدىڭ قاڭتار–ماۋسىم ايلارىندا ورتاشا ايلىق جالاقى 7،1 ملن سۋمدى قۇرادى، بۇل سول باعام بويىنشا شامامەن 270 مىڭ تەڭگەگە تەڭ. قازاقستاندا وسى كەزەڭدە ورتاشا جالاقى 480،5 مىڭ تەڭگەگە جەتتى. دەمەك، «كوبالت» باعاسىنىڭ ايىرماشىلىعى وزبەكستانداعى ەكى ورتاشا جالاقىدان اسىپ تۇسەدى.
تانىمال كروسسوۆەرلەردە جاعداي كەرىسىنشە. ماسەلەن، Hyundai Tucson قازاقستاندا 12،5 ملن تەڭگەدەن باستاپ ۇسىنىلسا، وزبەكستاندا باعاسى شامامەن 429 ملن سۋمنان، ياعني 16،3 ملن تەڭگەدەن باستالادى. ايىرماشىلىق 3،8 ملن تەڭگە شاماسىندا.
Kia Sportage-تە دە جاعداي ۇقساس. قازاقستانداعى رەسمي ديلەرلەردە باعالار 12،8 ملن تەڭگەدەن، ال وزبەكستاندا 432،2 ملن سۋمنان (≈16،4 ملن تەڭگە) باستالادى. ايىرماشىلىق 3،6 ملن تەڭگەگە جەتەدى.
قىتايلىق اۆتوموبيلدەر دە قازاقستاندا ءجيى ارزان. Changan CS55 Plus قازاقستاندا شامامەن 10،5 ملن تەڭگە، ال وزبەكستاندا 300 ملن سۋم، ياعني 11،4 ملن تەڭگە تۇرادى. وسىلايشا، قازاقستاندىق كروسسوۆەر شامامەن 910 مىڭ تەڭگەگە ارزان.
Hyundai Mufasa قازاقستاندا شامامەن 12 ملن تەڭگەگە، ال وزبەكستاندا 369 ملن سۋمعا (14 ملن تەڭگە) ۇسىنىلادى. Jetour X70 قازاقستاندا 9،9 ملن تەڭگە، وزبەكستاندا 286،1 ملن سۋم، ياعني شامامەن 10،9 ملن تەڭگە تۇرادى. Haval M6-دا ايىرماشىلىق از: قازاقستاندا شامامەن 9،04 ملن تەڭگە، وزبەكستاندا شامامەن 9،52 ملن تەڭگە. Haval Jolion قازاقستاندا 8،75 ملن تەڭگەدەن باستاپ ساتىلسا، وزبەكستاندىق باعاسى شامامەن 10،6 ملن تەڭگەگە تەڭ.
سالىستىرۋ ەكى نارىقتاعى اۆتوموبيلدەردىڭ باستاپقى باعالارىنداعى ايىرماشىلىقتى كورسەتەدى، ءبىراق كومپلەكتاسيا ەرەكشەلىكتەرىن ەسكەرمەيدى. قازاقستان مەن وزبەكستانعا ارنالعان كولىكتەر قوزعالتقىشتارىمەن، بەرىلىس قوراپتارىمەن، جابدىقتالۋىمەن جانە باسقا دا سيپاتتامالارىمەن ەرەكشەلەنۋى مۇمكىن. سونىمەن قاتار، ءوز بەتىنشە اكەلىنگەن ءاۆتوموبيلدىڭ تۇپكىلىكتى قۇنىنا لوگيستيكا، كەدەندىك جانە باسقا دا تولەمدەردى قوسۋعا تۋرا كەلەدى.
سوندىقتان كورشى ەلدەگى ماشينانىڭ ارزان باعاسى ونى قازاقستانعا يمپورتتاۋ جەرگىلىكتى رەسمي ساتۋشىدان اۆتوموبيل ساتىپ الۋدان ءتيىمدى بولادى دەگەندى بىلدىرمەيدى.
بۇعان دەيىن كۋرسيۆ اۆتو Cobalt تامىز ايىندا قازاقستاننىڭ اۆتوكولىك نارىعىندا ءبىرىنشى ورىندى ساقتاپ قالعانىن حابارلاعان بولاتىن.