اقش-تىڭ چيكاگو قالاسى مەن ينديانا شتاتىنىڭ سولتۇستىك-باتىس بولىگىندە تولاسسىز جاڭبىر مەن قاتتى جەلدىڭ سالدارىنان جارتى ميلليوننان استام ادام ەلەكتر جارىعىنسىز قالدى. بۇل تۋرالى infohub.kz سايتى حابارلايدى.
سەيسەنبى كۇنى ايماقتى شارپىعان ءقاۋىپتى داۋىل اسپاندى قاراڭعىلىققا بولەپ، شتاتتار ارالىعىندا وتە كۇشتى جەل تۋدىردى. يللينويس پەن ينديانادا تورنادو دابىلى ەستىلىپ، چيكاگونىڭ ەكى ءىرى اۋەجايىندا تاڭعى ۋاقىتتا بارلىق رەيستەر ۋاقىتشا توقتاتىلدى. جەكە مەتەوستانسيالاردىڭ مالىمەتىنشە، جەلدىڭ جىلدامدىعى ساعاتىنا 128 شاقىرىمنان اسقان كوپتەگەن جاعداي تىركەلگەن.
ۇلتتىق مەتەورولوگيالىق قىزمەتى بۇل داۋىلداردى «وتە ءقاۋىپتى» دەپ سيپاتتادى. الەۋمەتتىك جەلىلەردە جولداردىڭ سۋعا تولىپ، اعاشتاردىڭ ەلەكتر سىمدارىنا قۇلاعانى جانە ۇيلەردىڭ شاتىرلارىنىڭ جىرتىلعانى كورسەتىلگەن فوتوسۋرەتتەر تارادى. چيكاگونىڭ ماڭىنداعى حوۋمۆۋد قالاشىعىندا داۋىل وتكەننەن كەيىن، 54 جاستاعى دجاۆيد دجەنكينس ۇيىندەگى توڭازىتقىشتاعى ازىق-ت ۇلىكتى ساقتاۋ ءۇشىن گەنەراتوردى ىسكە قوسۋعا جانارماي ىزدەپ جۇرگەنىن ايتتى.
«جارىق جوق. بۇل وتە قورقىنىشتى بولدى. ءبىز جەرتولەدە وتىردىق»، — دەدى دجەنكينس. «ءبىز قارعا، سۋىققا ۇيرەنگەنبىز. ءبىراق بۇعان دايىن ەمەسپىز».
Poweroutage.us سايتىنىڭ مالىمەتىنشە، يللينويس پەن ينديانادا 600 مىڭنان استام تۇتىنۋشى جارىقسىز قالعان. ينديانانىڭ لەيك جانە پورتەر وكرۋگتەرى، سونداي-اق چيكاگودان وڭتۇستىككە قاراي ورنالاسقان يللينويستىڭ ۋيلل وكرۋگى ەرەكشە زارداپ شەكتى. شىعىسقا قاراي وگايو شتاتىندا 166 مىڭنان استام تۇتىنۋشى ەلەكتر جارىعىنسىز قالدى.