قىتايدىڭ چانە-7 اي ميسسياسىنىڭ ۇشىرىلۋى كۇتپەگەن جەردەن كەيىنگە قالدىرىلدى. بۇل تۋرالى ەلدىڭ عارىش اگەنتتىگى رەسمي تۇردە حابارلادى، دەپ infohub.kz سايتى حابارلايدى.
العاشقى جوسپار بويىنشا، چانە-7 عارىش اپپاراتى الداعى كۇندەرى قىتايدىڭ وڭتۇستىگىندەگى حاينان ارالىندا ورنالاسقان ۆەنچان عارىش ايلاعىنان ۇشىرىلۋى ءتيىس ەدى. الايدا جەكسەنبى كۇنى جاريالانعان قىسقاشا مالىمدەمەدە قىتايدىڭ عارىش اگەنتتىگى ميسسيانىڭ ۇشىرۋ تالاپتارىنا سايكەس كەلمەيتىنىن جانە بيىلعى جوسپارلانعان تەرەزەدە وتكىزىلمەيتىنىن ايتتى.
اگەنتتىك بۇل شەشىم «ساقتىق، سەنىمدىلىك جانە ميسسيانىڭ ءابسوليۋتتى تابىستى بولۋى» قاعيداتتارىنا سۇيەنە وتىرىپ، «كەشەندى باعالاۋدان» كەيىن قابىلدانعانىن قوستى. الايدا ناقتى سەبەپتەر كورسەتىلمەدى.
چانە-7 ميسسياسىنا دايىندىق سوڭعى اپتالاردا ۆەنچان ۇشىرۋ الاڭىندا جۇرگىزىلدى. بۇل چانە اي بارلاۋ باعدارلاماسىنىڭ جەتىنشى ميسسياسى. بۇعان دەيىنگى رەسمي حابارلامالارعا سايكەس، ول نەگىزگى تەحنولوگيالاردا سەرپىلىس جاساۋدى ماقسات ەتكەن.
ميسسيانىڭ ماقساتى — ايدىڭ تۇراقتى كولەڭكەدەگى كراتەرلەرىن زەرتتەۋ جانە ايدىڭ وڭتۇستىك ءپوليۋسىنىڭ ەكولوگيالىق جانە رەسۋرستىق شولۋىن جۇرگىزۋ، دەپ رەسمي سينحۋا اگەنتتىگى عارىش اگەنتتىگىنە سىلتەمە جاساپ حابارلادى.
چانە — قىتايلىق اي قۇدايىنىڭ اتى. الدىڭعى چانە-6 زوندى 2024 جىلى ايدىڭ ارتقى جاعىنان تاۋ جىنىستارى مەن توپىراق ۇلگىلەرىن الىپ، الەمدە ءبىرىنشى بولىپ جەرگە ورالدى.