قىتايدىڭ بۇرىنعى پرەمەر-مينيسترى، ەكونوميكالىق رەفورمالاردىڭ نەگىزىن قالاۋشىلاردىڭ ءبىرى چجۋ جۋنسزي 97 جاسىندا قايتىس بولدى. بۇل تۋرالى مەملەكەتتىك اقپارات اگەنتتىگى حابارلادى، دەپ حابارلايدى infohub.kz سايتى.
چجۋ جۋنسزي 1998-2003 جىلدارى پرەمەر-مينيستر قىزمەتىن اتقارعان. ول مەملەكەتتىك كاسىپورىنداردى تيىمدىلىككە جەتەلەپ، قىتايدىڭ دۇنيەجۇزىلىك ساۋدا ۇيىمىنا (دسۇ) كىرۋىنە جول اشقان. ونىڭ رەفورمالارى قىتايدىڭ 2010 جىلى جاپونيانى باسىپ وزىپ، اقش-تان كەيىنگى ەكىنشى ءىرى ەكونوميكاعا اينالۋىنا ىقپال ەتتى.
چجۋ جۋنسزي 1928 جىلى 23 قازاندا ماو سزەدۋننىڭ تۋعان پروۆينسياسى حۋناندا دۇنيەگە كەلگەن. 1957 جىلى ۆەنگريا مەن يۋگوسلاۆياداعى رەفورمالاردى ماقۇلداعانى ءۇشىن «وڭشىل» دەپ ايىپتالىپ، 22 جىلعا سوزىلعان ساياسي قۋعىنعا ۇشىرادى. 1966-1976 جىلدارداعى مادەني رەۆوليۋسيا كەزىندە اۋىلعا جەر اۋدارىلىپ، قول ەڭبەگىمەن اينالىستى.
1979 جىلى اقتالعاننان كەيىن چجۋ جۋنسزي تەز كوتەرىلىپ، 1987 جىلى شانحاي پارتيا كوميتەتىنىڭ حاتشىسىنىڭ ورىنباسارى، 1988 جىلى اكىم بولدى. 1989 جىلى نارازىلىق بىلدىرۋشىلەرمەن كەلىسسوز جۇرگىزىپ، اسكەردى شاقىرماۋعا ۋادە بەرىپ، ۇستامدىلىق تانىتتى.
1991 جىلى پرەمەر-مينيستردىڭ ورىنباسارى، 1993 جىلى پارتيانىڭ جەتەكشى كوميتەتىنىڭ مۇشەسى بولدى. 1998 جىلى پرەمەر-مينيستر لاۋازىمىنا تاعايىندالعاندا، ول سىبايلاس جەمقورلىققا قارسى كۇرەستە قاتاڭ ۇستانىمىن ءبىلدىرىپ، «مەن 100 تابىت دايىندادىم — 99-ى سىبايلاس جەمقور شەنەۋنىكتەرگە، بىرەۋى وزىمە» دەگەن ءسوزى كەڭىنەن تارادى.
چجۋ ءجۋنسزيدىڭ تۇسىندا جۇڭگو 2001 جىلى دسۇ-عا مۇشە بولدى. بۇل ەلدىڭ الەمدەگى ەڭ ءىرى ەكسپورتتاۋشىعا اينالۋىنا جول اشتى. ول سونداي-اق 1998 جىلى مەملەكەتتىك كاسىپورىنداردىڭ پاتەرلەرىن ساتۋ باعدارلاماسىن باستاپ، تۇرعىن ءۇي نارىعىنىڭ دامۋىنا سەرپىن بەردى.
چجۋ جۋنسزي بيلىكتەگى كەمشىلىكتەردى مويىنداپ، جاۋاپكەرشىلىكتى وزىنە الۋىمەن ەرەكشەلەندى. 1998 جىلى جازعى سۋ تاسقىنىنان 4150 ادام قازا تاۋىپ، شەنەۋنىكتەردىڭ قاراجات ۇرلاۋى اشكەرەلەنگەننەن كەيىن، ول كەيبىر بوگەتتەردىڭ «توفۋدان بەرىك ەمەس» ەكەنىن ايتتى. 2001 جىلى وڭتۇستىك قىتايداعى مەكتەپتە بولعان جارىلىستان كەمىندە 42 ادام، نەگىزىنەن بالالار قازا تاپقان وقيعاعا بايلانىستى ۇكىمەت اتىنان ۇلتتىق تەلەارنادا كەشىرىم سۇرادى.
چجۋ جۋنسزي قوعامدىق شارالارعا سيرەك قاتىسىپ، قىزمەتتەن كەتكەننەن كەيىن كوپشىلىك الدىندا كورىنبەدى. ول ايەلى لاو انمەن بىرگە ءومىر ءسۇردى. ولاردىڭ ۇلى يۋنلاي (لەۆين چجۋ) — مەملەكەتتىك ينۆەستيسيالىق بانك China International Capital Corp. كومپانياسىنىڭ بۇرىنعى باس ديرەكتورى. قىزى يانلاي مەكتەپ وقۋشىلارىنا قولداۋ كورسەتەتىن قايىرىمدىلىق ۇيىمىن باسقاردى.