جۇڭگو حالىق رەسپۋبليكاسى مەملەكەتتىك كەڭەسىنىڭ بۇرىنعى پرەمەرى چجۋ جۋنسزي 97 جاسىندا قايتىس بولدى. ول قىتايدىڭ الەمدىك ساۋداعا ينتەگراسيالانۋىندا شەشۋشى ءرول اتقارىپ، ەلدىڭ قارقىندى ەكونوميكالىق وسۋىنە نەگىز قالاعان ەدى، دەپ حابارلايدى infohub.kz.
چجۋ جۋنسزي 1998-2003 جىلدارى ەلدەگى ەكىنشى ماڭىزدى قىزمەتتى اتقاردى. ول قىتايدىڭ دۇنيەجۇزىلىك ساۋدا ۇيىمىنا (دسۇ) كىرۋىنىڭ، جۇڭگو كاسىپورىندارىنىڭ حالىقارالىق نارىققا اشىلۋىنىڭ جانە شەتەلدىك ينۆەستيسيالاردى تارتۋدىڭ باستى ساۋلەتشىلەرىنىڭ ءبىرى بولدى.
ول تاريحتا ماڭىزدى ەكونوميكالىق رەفورماتورلاردىڭ ءبىرى رەتىندە قالدى. ءدال وسى ول سالىق وكىلەتتىكتەرىن جەرگىلىكتى بيلىكتەن ورتالىق ۇكىمەتكە بەردى، رەنتابەلدى ەمەس مەملەكەتتىك كاسىپورىنداردى جويدى نەمەسە جەكەشەلەندىردى، سونداي-اق جەكە تۇرعىن ءۇي نارىعىنىڭ دامۋىنا سەرپىن بەردى.
كوپشىلىك ونى قاتال ءارى پراگماتيكالىق كوشباسشى رەتىندە ەسكە الادى. ول ەكى تاڭبالى ءوسۋ كورسەتكىشتەرىنە قول جەتكىزىپ، ءوز پىكىرىن ايتۋدان قورىقپادى. 1998 جىلى ول قىتايدى كەز كەلگەن ساتتە بۇرق ەتە قالۋى مۇمكىن كوپتەگەن الەۋەتتى داعدارىستار كۇتىپ تۇرعانىن مالىمدەدى. «قاراپايىم حالىق بىزگە كوپتەگەن سەبەپتەرمەن نارازى. اسىرەسە باسشىلار اراسىنداعى سىبايلاس جەمقورلىق، بايلار مەن كەدەيلەر اراسىنداعى الشاقتىق جانە كەيبىر جەرگىلىكتى باسشىلاردىڭ ءوزىن تيران رەتىندە ۇستاۋى»، — دەدى ول.
چجۋ جۋنسزي ادال ەمەس بانكيرلەردى «اقىماقتار» دەپ اتادى جانە يانسزى بويىنداعى بوگەتتەر مەن سۋ تاسقىنىنا قارسى پلوتينالاردى «توفۋ سياقتى سەنىمسىز ءارى كەۋەكتى» دەپ ايتتى.
ونىڭ باسشىلىعىمەن ەكونوميكانى تۇراقتاندىرۋعا جانە سىبايلاس جەمقورلىق دەڭگەيىن تومەندەتۋگە قول جەتكىزىلدى. جۇڭگو كوممۋنيستىك اۋتسايدەر مارتەبەسىنەن ارىلىپ، ونەركاسىپتىك دەرجاۆاعا اينالا باستادى. سونىمەن قاتار، بۇل رەفورمالار بەس جىل ىشىندە 30 ميلليون ادامنىڭ جۇمىستان بوساتىلۋىنا اكەلدى، ال وراسان زور ەكونوميكالىق ءوسۋ تەڭسىزدىكتى ودان ءارى ارتتىردى.
چجۋ جۋنسزي 1928 جىلى ورتالىق حۋنان پروۆينسياسىندا دۇنيەگە كەلگەن جانە مەملەكەتتىك قىزمەتكە كىرمەس بۇرىن ەلەكتر ينجەنەرى ديپلومىن العان. 1949 جىلى كوممۋنيستىك پارتياعا كىردى. ول ەكى رەت «پارتيالىق تازارتۋدان» ءوتتى: ءبىرىنشى رەت ماو سزەدۋننىڭ ەكونوميكالىق ساياساتىن يرراسيونالدى دەپ اتاعانى ءۇشىن، ونى «وڭشىل اۋىتقۋشى» دەپ اتادى، ال ەكىنشى رەت — مادەني رەۆوليۋسيا كەزىندە.
ماو قايتىس بولعاننان كەيىن چجۋ پارتياعا قايتارىلىپ، 1991 جىلعا قاراي جۇڭگو ەكونوميكاسىنا جاۋاپتى ۆيسە-پرەمەر قىزمەتىن اتقاردى. جەتى جىلدان كەيىن ول پرەمەر بولدى. چجۋ 2002 جىلى قىتايدىڭ دۇنيەجۇزىلىك ساۋدا ۇيىمىنا كىرۋى بويىنشا كۇردەلى كەلىسسوزدەر جۇرگىزدى.
قىتايدىڭ مەملەكەتتىك باق-تاعى نەكرولوگتاردا ول «ۋاقىت سىنىنان وتكەن كوممۋنيزم يدەالدارىنىڭ ادال كۇرەسكەرى، كورنەكتى پرولەتارلىق رەۆوليۋسيونەر جانە ساياسي قايراتكەر» رەتىندە سيپاتتالادى.